शेखर कोइराला समूहद्वारा चियापानको आयोजना, महामन्त्री थापा र उपसभापति गुरुङ पनि सहभागी

१३ असोज, काठमाडौं । नेपाली कांग्रेसका नेता डा. शेखर कोइराला समूहले काठमाडौंको बत्तीसपुतलीस्थित एक पार्टी प्यालेसमा चियापान कार्यक्रम आयोजना गरेका छन् । चियापान कार्यक्रममा उल्लेख्य नेताहरुको उपस्थिति रहेको छ ।

बिहीबार बिहानको चियापान कार्यक्रममा कोइरालासँगै उपसभापति धनराज गुरुङ र महामन्त्री गगन थापा पनि सहभागि छन् । यसअघि कोइराला पक्षले पार्टीलाई खबरदारी गर्न भन्दै पार्टी कार्यालय सानेपामा आयोजना गरेको धर्ना कार्यक्रममा सहभागी नभएका नेताहरु आजको चियापान कार्यक्रममा भने सहभागी छन् ।

चियापानको यो कार्यक्रमलाई पनि कोइराला पक्षले खबरदारीकै निरन्तरता भनेको छ । आगामी निर्वाचनको सिट बाँडफाँटमा सम्मानजनक रुपमा टिकट पाउनुपर्ने माग गर्दै आएको शेखर पक्षले बुधबार पार्टी केन्द्रीय कार्यालय सानेपामा धर्ना दिएको थियो । पार्टी कमिटीहरुमा सम्मानजनक स्थान नपाएको भन्दै शेखर पक्षले विभिन्न कार्यक्रम गरी विरोध जनाउँदै आएको छ ।