देउवा-कोइराला विवाद गठबन्धनमा प्रवेश, घिमिरेको चुनौतिले प्रचण्डलाई तनाव

१३ असोज, काठमाडौं । नेपाली कांग्रेसका सभापति शेरबहादुर देउवाले उम्मेदवार चयनमा एमलौटी गरेको भन्दै संस्थापनइतर पक्ष डा शेखर कोइराला समूहले राखेको असन्तुष्टि सत्ता गठबन्धनभित्र पनि प्रवेश गरेको छ । गठबन्धनमा अहिले सिट बाँडफाँडभन्दा सत्तारूढ दल कांग्रेसभित्र उत्पन्न विवाद मुल मुद्दा बनेको छ । कांग्रेसको असन्तुष्ट समूहले आफ्नै पार्टी र अन्य दलमाथि दवाव बढाएपछि गठबन्धनभित्रै यस विषयले प्रवेश पाएको हो ।

कोइराला समूहले गठबन्धनमा भइरहेको सिट बाँडफाँडमा आफ्नो समूहलाई नसमेटे गठबन्धनमा रहेका अन्य दललाई समेत नसघाउँने बताएपछि तरंग उत्पन्न भएको हो । चरणबद्ध आन्दोलनका कार्यक्रम सार्वजनिक गरेको कोइराला समूहले पार्ने प्रभावबारे गठबन्धनका अन्य नेताहरूले पनि छलफल सुरु गरेका छन् ।

कोइराला समूहका नेता गुरुराज घिमिरेले गठबन्धनले आफ्नो पक्षलाई उचित स्थान नदिए चितवन क्षेत्र नं ३ बाट नेकपा माओवादीका अध्यक्ष पुष्पकमल दाहाल‘प्रचण्ड’बिरुद्ध उम्मेदवारी दिने चेतावनी दिएपछि प्रचण्डसमेत तनावमा परेका छन् । उनलाई हराउन एमालेले राप्रापाका उम्मेदवारलाई सघाउने बताइरहेका बेला घिमिरेले उनीबिरुद्ध उम्मेदवारी दिने चेतावनीपछि प्रचण्ड तनावमा रहेको बताइएको छ ।

कोइराला समूहका नेताहरुले पनि प्रधानमन्त्री एवं कांग्रेस सभापति शेरबहादुर देउवासहितका पार्टी नेता र माओवादी अध्यक्ष पुष्पकमल दाहालसँग छुट्टाछुट्टै भेटेर छलफलसमेत गरेका छन् । बुधबार बिहान कांग्रेस महामन्त्री गगन थापाले खुमलटार पुगेर कांग्रेस विवाद र गठबन्धनमा पर्न सक्ने असरबारे प्रचण्डसँग छलफल गरेका थिए ।

माओवादी अध्यक्ष प्रचण्डले कांग्रेसको आन्तरिक विवाद र निर्वाचनमा गठबन्धनको विषयमा चासो राखेका थिए । ‘पार्टीभित्रको आन्तरिक आयाम नमिलाईकन दलका बीचमा मात्रै गठबन्धन गर्दा त्यसले परिणाम नदिने’ थापाको भनाइ थियो । ‘पार्टीभित्रको आन्तरिक आयाम नमिलाईकन दलका बीचमा मात्रै गठबन्धन गर्दा त्यसले राम्रो परिणाम नदिने महामन्त्री थापाले बताएका थिए ।

भेटमा महामन्त्री थापाले गठबन्धनमा सहमति भएका भनिएका अधिकांश स्थान आफ्नो समूहले दाबी गरेका र जित्ने आधार भएका स्थान रहेकाले त्यसको असर निर्वाचनमा पर्न सक्नेतर्फ संकेत गरेका थिए । थापासँगको भेटमा प्रचण्डले आफूले यसबारे सभापति देउवासँग छलफल गर्ने बताएका थिए । थापाले भेटेपछि त्यसलगत्तै प्रचण्डले पनि सभापति देउवास्ँग भेट गरेका थिए ।