कांग्रेस संसदीय बोर्डको बैठक बालुवाटारमा जारी, उम्मेदवार चयनका विषयमा घम्साघम्सी !

१३ असोज, काठमाडौं । नेपाली कांग्रेसका सभापति शेरबहादुर देउवाले पार्टीका असन्तुष्ट पक्षको माग सम्बोधन गर्ने जनाएपछि यसै विषयमा छलफल गर्न संसदीय बोर्डको बैठक बसिरहेको छ । प्रधानमन्त्री देउवाको सरकारी निवास बालुवाटारमा जारी बैठकमा उम्मेदवार छनोटबारे छलफल भइरहेको बताइएको छ ।

बैठकमा समानुपातिक तर्फका उम्मेदवारको बन्दसूची सच्याउने र प्रत्यक्षतर्फ टिकट वितरणसम्बन्धी छलफल भइरहेको बैठकमा सहभागी एकनेताले जानकारी दिए । निर्वाचन आयोगले सार्वजनिक गरेको कार्यतालिकाअनुसार असोज २३ गते प्रदेश र प्रतिनिधिसभा निर्वाचनमा प्रत्यक्षतर्फको उमेदवारी मनोनय दर्ता गराउनुपर्ने छ ।

कांग्रेसले पाँचदलीय गठबन्धन गरेसँगै बढीमा ८५ सीट पाउने पक्का जस्तै छ । तर, ३३० मध्ये प्रदेशतर्फ कति सीट पाउँछ एकिन छैन ।बैठकमा कहाँ कुन नेतालाई टिकट दिने भन्नेबारे पनि छलफल चलेको छ । पार्टीभित्र शेखर कोइराला समूहले सम्मानजनक सीट नपाए विद्रोहको चेतावनी दिइरहेको छ । सोही अनुरुप समूहले बुधबार पार्टी मुख्यालयमा धर्ना दिएको थियो । सीट बाँडफाँटमा एकलौटी भए विद्रोहको चेतावनी यो समूहले दिँदै आएको छ ।

देउवाले बुधबार मात्रै वरिष्ठ नेता शेखर कोइराला समूहले उठाएका मात्र सम्बोधन गरी पार्टीलाई निर्वाचनमा एक बनाएर लाने बताएका थिए । साेही अनुसार कोइराला समूहले पनि आफ्ना गतिविधि अगाडी बढाएको छ । सभापति देउवा गठबन्धनका दललाई मनाउने र पार्टीभित्रका असन्तुष्ट पक्षलाई समेट्नुपर्ने दोहोरो दवावमा परेका छन् ।