बालुवाटारमा बैठक नै बैठकः दिउँसो गठबन्धन कार्यदलको, साँझ पाँच दलका शीर्ष नेताको

 १३ असोज, काठमाडौं । आगामी प्रदेश र प्रतिनिधिसभाको निर्वाचनका उम्मेदवारको मनोनयन दर्ता गर्ने दिन नजिकिँदै गर्दा सीट भाबण्डाका लागि लामो समयदेखि छलफलमा रहेको सत्ता गठबन्धन कार्यदलले सहमति जुटाउन छलफल सुरु गरेको छ ।

निर्वाचन आयोगले सार्वजनिक गरेको कार्यतालिकाअनुसार असोज २३ गते प्रदेश र प्रतिनिधिसभा निर्वाचनमा प्रत्यक्षतर्फको उमेदवारी मनोनय दर्ता गराउनुपर्ने भएकाले पनि दलहरु उम्मेदवार चयनको चटारोमा छन् । कार्यदलले सघीय निर्वाचन क्षेत्रमा नै सहमति जुटाउन सकेको छैन् । प्रदेशसभाका सीटबारे सामान्य छलफलमात्रै भएको छ ।

दिउँसो गठबन्धनको कार्यदलले बनाउने सहमतिको रोडम्यापमा बिहीबार साँझ पाँच दलका शीर्ष नेताहरुले छलफल गर्नेछ । कार्यदलका सदस्य एवं जसपाका नेता मनिष सुमनका अनुसार २ बजेदेखि प्रधानमन्त्रीको सरकारी निवास बालुवाटारमा कार्यदल छलफलमा जुटेको हो । आजको बैठकमा प्रदेशतर्फ सिट बाँडफाँटको विषयमा सहमतिको रोडम्याप तयार गरिनेछ । ३३० प्रदेशसभा निर्वाचन क्षेत्रमा कुन दललाई कति सिट लिने भन्ने मोटामोटी खाका बनाउने जिम्मा कार्यदललाई छ ।

कार्यदलले २०७४ मा जितेको स्थान र वैशाख ३० को स्थानीय तह निर्वाचनमा पाएको मतलगायतका विषयमा मापदण्ड तयार गर्ने बताइएको छ । यसपछि आजै साँझ ६ बजे गठबन्धनका शीर्ष नेताहरूको बैठक बस्नेछ । बैठकमा प्रतिनिधि र प्रदेशसभा निर्वाचनका लागि सिट बाँडफाँटलाई निचोडमा पुर्याउने बताइएको छ । सीट संख्या निस्चित भएपछि दलहरुले आआफ्ना उम्मेदवार तयार गर्ने छन् ।