आरजुले छाडेको कैलाली–५ मा कांग्रेका दुई नेताले दिए स्वतन्त्र उम्मेदवारी

२३ असोज, धनगढी । प्रधानमन्त्री पत्नी आरजु देउवाले छाडेको कैलाली ५ मा  नेपाली कांग्रेसका दुई नेताले स्वतन्त्र उम्मेदवारी दर्ता गराएका छन् । कैलाली–५ मा पुष्करनाथ ओझाले प्रतिनिधिसभा र कांग्रेस महाधिवेशन प्रतिनिधि क्षितिज भण्डारीले क्षेत्र नम्बर–५ (ख) का लागि स्वतन्त्र उम्मेदवारी दर्ता गराएका हुन् ।

दुई नेताले कैलाली–५ को मुख्य निर्वाचन अधिकृतको कार्यालयमा पुगेर मनोनयन दर्ता गराएका हुन् । पुष्करनाथ ओझालाई कांग्रेसले कारबाही गरेको छ । कैलाली–५मा गठबन्धनबाट नेपाली कांग्रेसका नेता डिल्लीराज ओझा र एमालेबाट नारदमुनि राना उम्मेदवार छन् ।

४ मंसिरमा हुने चुनावमा कैलाली–५ का मतदाताको स्वाभिमान र आत्मसम्मानको रक्षा गर्न चुनाव लड्ने पुष्करनाथ ओझाले जनाएका छन् । नेपाली कांग्रेसको राजनीतिमा २०३४ सालदेखि क्रियाशील रहेका ओझालाई कारबाही गरिएको थियो ।

यसैगरी राष्ट्रिय स्वतन्त्र पार्टीका तर्फबाट कैलाली–५ को प्रतिनिधि सभाका लागि ईश्वरी विष्टले पनि मनोनयन दर्ता गराएकी छन् ।