टिकट नपाएको झोँकमा कांग्रेस नेता पौडेलले गरे पार्टी परित्याग

२३ असोज, काठमाडौं । नेपाली कांग्रेसका नेता किरण पौडेलले पार्टी परित्याग गरेका छन् । उनले प्रधानमन्त्रीसमेत रहेका कांग्रेस सभापति शेरबहादुर देउवाको विवेकमा प्रश्न उठाएर राजीनामा बुझाएका छन् । उनले कांग्रेसको सदस्य समेत नरहने गरी राजीनामापत्र बुुझाएका हुन् ।

सभापति देउवालाई सम्बोधन गरेर कांग्रेसको इमेलमा राजीनामापत्र पठाएको उनले जाकारी दिएका छन् । आफुले ४४ वर्षसम्म नेपाली कांग्रेसमा खर्चिएको र १२औँ महाधिवेशनदेखि लगातार देउवाको टिममै रहँदा पनि टिकट नपाएको बताएका छन् ।

टिकट वितरणमा सभापति देउवाको विवेक नदेखिएको भन्दै उनले विवेकहीन निर्णय गर्ने मान्छेको नेतृत्वमा पार्टी चल्न नसक्ने उल्लेख गरेका छन् ।

पोडेलले महामन्त्री वा पार्टीका अरू कोही व्यक्तिसँग आफ्नो कुनै गुनासो नरहेको भन्दै सभापति देउवाकै कारण पार्टी छाड्ने निर्णयमा पुगेको बताएका छन् । उनले देउवामाथि आरोप लगाउँदै कांग्रेसमा नरहने गरी राजीनामा बुझाएको बताएका छन् । आगामी दिनमा पनि राजनीतिमा सक्रिय नै रहने उनको भनाई छ ।