पत्नी आरजुमार्फत् प्रधानमन्त्री देउवाको मनोनयन दर्ता

२३ असोज, धनगढी ।  प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले पत्नी आरजु देउवामार्फत मनोनयन दर्ता गराएका छन् । डडेलधुराबाट प्रतिनिधिसभा सदस्यका लागि उनको मनोनयन भएको हो । देउवा सातौंपटक डडेलधुराबाट निर्वाचनमा प्रतिस्पर्धा गर्दैछन् । आइतबार दिउँसो २ बजे डा. आरजु देउवाले मुख्य निर्वाचन कार्यालयमा पुगेर उनको उम्मेदवारी दर्ता गराएकी हुन् ।

प्रधानमन्त्री देउवाका तर्फबाट मन्जुरीनामा लिएर उम्मेदवारी दर्ता गराउन शनिबार नै कांग्रेस केन्द्रीय सदस्य आरजु देउवा डडेलधुरा पुगेकी थिइन् । अघिल्ला निर्वाचनमा देउवाका तर्फबाट स्थानीय नेताहरूले उम्मेदवारी दर्ता गर्ने गरेका थिए । देउवाले २०४८ र २०५६ बाहेकका हरेक निर्वाचनमा प्रतिनिधि मार्फत् उम्मेदवारी दर्ता गराउँदै आएका छन् ।

प्रधानमन्त्री देउवापछि उनीविरुद्ध दुई महिनादेखि चुनावी अभियानमा रहेका गुल्मीका सागर ढकालले पनि मनोनयन दर्ता गराएका छन् । यसैगरी एमालेका असन्तुष्ट नेता विक्रमबहादुर शाहीले स्वतन्त्र उम्मेदवारका रुपमा मनोनयन दर्ता गराएका छन् ।