कहिले आउँछ नेपाली कांग्रेसको घोषणपत्र ? ढिलाइले महामन्त्री शर्मा तनावमा

२६ असोज, काठमाडौं । सत्ता नेतृत्व गरिरहेको नेपाली कांग्रेसका नेताहरु आगामी मंसिर ४ को प्रदेश र प्रतिनिधिसभा सदस्य निर्वाचनका लागि चुनावी प्रचार अभियानमा लाग्दा समेत अहिलेसम्म पार्टीको घोषणापत्र सार्वजनिक गर्न सकेको छैन् । घोषणापत्र बिनै चुनाव प्रचारप्रसारमा जान अप्ठ्यारो भइरहेको भन्दै चाँडो घोषणापत्र ल्याउन महामन्त्री विश्वप्रकाश शर्मामाथि नेताहरुले दवाव बढाएका छन् ।

सत्ता गठबन्धनको भागबण्डामा अल्झिँदा कांग्रेसलाई घोषणापत्रको काम सक्न समय लागेको नेताहरुको भनाइ छ । प्रतिनिधिसभा र प्रदेशसभा निर्वाचनका लागि महामन्त्री विश्वप्रकाश शर्माको नेतृत्वमा घोषणापत्र मस्यौदा समिति गठन गरिएको थियो । उत्त समितिमा पार्टीका पदाधिकारी र केन्द्रीय सदस्यहरूसहित विभिन्न क्षेत्रका विज्ञहरु रहेका छन् ।

समितिले सबै वर्ग, समुदाय, उमेर समूह र भूगोलको विविधतालाई केन्द्रमा राख्ने भन्दै घोषणापत्रका लागि देशभरबाट सुझाव संकलन गरेको थियो । अहिले सुझावका आधारमा घोषणापत्र मस्यौदा लेखनको काम भइरहेको छ । समिति सदस्यका अनुसार कांग्रेसले घोषणापत्रमा राष्ट्रियता, राष्ट्रिय सुरक्षा र विदेश नीतिलाई मुख्य प्राथमिकता दिएको छ ।

घोषणपत्रमा राष्ट्रियता, सुरक्षा नीति र विदेश नीतिका विषयमा सत्ता र प्रतिपक्षको फरक–फरक धारणा हुन नहुने कांग्रेसको धारणा छ । यस विषयमा राष्ट्रिय सहमतिको प्रस्ताव तयार पार्ने र त्यसको नेतृत्व कांग्रेसले लिने विषय घोषणापत्रमा समावेश गरेको बताइएको छ । घोषणपत्र यथार्थ धरातलमा टेकेर तयार भइरहेको बताइएको छ । घोषणापत्रको प्रारम्भिक मस्यौदा तयार पार्दासम्म कांग्रेस राजनीतिक मुद्दामा एमालेसँग बढी आक्रमक देखिएको छ ।

तत्कालीन प्रधानमन्त्री केपी शर्मा ओलीले दुई प्रतिनिधिसभा विघटना गरेर राज्यव्यवस्थालाई नै क्षति पुर्याएको, संविधान र लोकतन्त्रलाई सत्ता गठबन्धनले ‘लिक’ मा ल्याएको कांग्रेसको निष्कर्ष छ । संविधानको सुरक्षा र कार्यान्वयनका निम्ति गठबन्धन गरेर चुनावमा जानुपरेको तर्क कांग्रेसले अघि सारेको छ ।

कांग्रेसले ०७४ को निर्वाचनमा संविधान र संघीयता कार्यान्वयनमा विशेष जोड दिएको थियो । यसपटक उसले आर्थिक समृद्धिको मार्गचित्रलाई प्राथमिकतामा राख्ने तयारी भइरहेको बताएको छ ।

कांग्रेस नेतृत्वमा सरकार बनेपछि अघि बढाइने आर्थिक मोडलका विषयमा राष्ट्रिय योजना आयोगका पूर्व दुई उपाध्यक्ष डा. स्वर्णिम वाग्ले र डा.गोविन्दराज पोखरेलले लेखनकार्य जारी राखेका छन् । समितिका एक सदस्यका अनुसार बीपी कोइरालाले लिएका आर्थिक नीति र विकासको मोडललाई थप व्याख्या गर्दै समुन्नतिको आधुनिक मार्गचित्र तयार पारिएको घोषणापत्र आउन अझै केही दिन लाग्ने बताइएको छ ।