प्रभु साहले गठबन्धनलाई सघाएर एमालेमाथि षडयन्त्रपूर्ण काम गरे, यो राजनीतिक कूकर्म होः महासचिव पोखरेल

२६ असोज, काठमाडौं । नेकपा एमालेले दिएको टिकट फालेर स्वतनत्रबाट उम्मेदवारी दिएका प्रभु साहमाथि षडयन्त्रकारी कर्म भन्दै एमालेले आक्रोस पोखेको छ । नेकपा एमालेका महासचिव शंकर पोखरेलले प्रभु साहले अराजनीतिक र अराजनीतिक षड्यन्त्र गरेको आरोप लगाएका छन् ।

बुधबार सामाजिक सञ्जालमार्फत महासचिव पोखरेलले साहले पार्टीलाई धोका दिएर स्वतन्त्र उम्मेदवारी दिनुका पछाडी ठूलो षडयन्त्र रहेको बताएका हुन् । मधेस प्रदेशमा जसपासँग तालमेल गर्ने सम्झौता बैठकमा सहभागी भए पनि साहले अन्तिम समयमा धोका दिएको महासचिव पोखरेलको भनाइ छ । साथै साहले गठबन्धनका नेतासँगको षड्यन्त्रपूर्ण साँठगाँठ गरेको आरोप पनि उनको छ ।

एमालेका स्थायी कमिटी सदस्य प्रभु साहसहितका जिल्लास्तरका केही नेता मधेस प्रदेशमा प्रतिनिधिसभा तथा प्रदेशसभामा स्वतन्त्र उम्मेदवारी दिएर अलग भएका हुन । प्रतिनिधिसभा र प्रदेशसभा सदस्यका लागि साह समूहले २५ स्थानमा स्वतन्त्र उम्मेदवारी दिइएको छ । जसपासँग मधेसमा चुनावी तालमेल गर्न नहुने पक्षमा रहेका साहले आफ्नै पार्टीको टिकट अस्वीकार गर्दै स्वतन्त्र उम्मेदवारी दिएका छन् ।

रौतहट–३ मा स्वतन्त्र उम्मेदवारी दिँदै साहले जसपासँग गठबन्धन गरेर एमाले अपवित्र भएको दाबी गरेका थिए । २०६४ सालदेखि उनले आफ्नो गृहनगर मौलापुरसमेत पर्ने त्यस क्षेत्रबाट चुनाव जित्दै आएका छन् । प्रतिनिधिसभाअन्तर्गत मधेसका ३२ निर्वाचन क्षेत्रमध्ये ८ वटामा विद्रोह भएको छ भने प्रदेशसभातर्फ १७ जनाले स्वतन्त्र उम्मेदवारी दिएका छन् ।

पोखरेलले लेखेका छन्, ‘प्रभु साह जसपासँगको तालमेलको सम्झौता बैठकमा सहभागी हुनु भो । उक्त सहमतिपश्चात मधेस प्रदेशमा उम्मेदवार टुंगो लगाउने छलफलमा बस्नु भो । निर्णयभएर अनुसार रौतहटको टिकट पनि लिएर जानु भो । तर पार्टीलाई धोका दिएर अन्तिम समयमा आफूले स्वतन्त्र उम्मेदवारी दिनु भो र अन्य क्षेत्रका उम्मेदवारको टिकटसमेत नदिकन समय गुजार्ने षडयन्त्र गर्नु भो ।’

उनले राजनीतिमा यस प्रकारको षडयन्त्रलाई असहमतिको जामा भन्ने गरिएको तर यसको कुनै अर्थ नभएको बताएका छन् । यस प्रकारको छलछाम गठबन्धनका नेतासँगको षडयन्त्रपूर्ण साँठगाँठ नै भएको भन्दै रौतहटका जनताले यस षडयन्त्रलाई राम्ररी बुझेको र मधेस प्रदेशमा नेकपा एमाले र जसपाबीचमा भएको सहकार्य र तालमेललाई पूर्ण रूपमा सफल बनाउन आग्रह पनि गरेका छन् ।