कैलालीमा आरजुलाई संकट, डडेलधुरामा देउवालाई धक्का

२६ असोज, कैलाली । मंसिर ४ का लागि तोकिएको प्रदेश तथा प्रतिनिधिसभा निर्वाचनमा कैलाली ५ मा आरजु देउवाका पीए प्रकाश देउवा र डडेलधुरामा एमालेले आफ्नो उम्मेदवार फिर्ता गर्दै कांग्रेस बीपीलाई सघाउने भएपछि प्रधानमन्त्रीसमेत रहेका नेपाली कांग्रेसका सभापति शेरबहादुर देउवालाई धक्का लागेको छ ।

कैलाली ५ को (ख) बाट प्रदेशसभा उम्मेदवार बनेका नेपाली कांग्रेसका बागी क्षितिज भण्डारीले नाम फिर्ता नगरेपछि आरजुलाई आफना स्वकीय सचिव (पीए) हार्ने कारणले चिन्ता बढेको हाे । निर्वाचन आयोगले तोकेको समय सीमामा यूवानेता भण्डारीले नाम फिर्ता गरेनन् ।कैलाली ५ (ख) मा प्रधानमन्त्री पत्नी आरजु देउवाका स्वकीय सचिव प्रकाश देउवा उम्मेदवार बनेका छन् ।

भण्डारीले उम्मेदवारी फिर्ता नगरेपछि आरजुलाई आफ्नै पीएलाई जिताउन मुस्किल परेको छ । भण्डारीले उम्मेदवारी फिर्ता गर्न प्रधानमन्त्रीको फोन आएको तर आफुले फिर्ता नगरेको नेपालबहसलाई बताए । भण्डारी संस्थापनइतर पक्षका हुन् । प्रधानमन्त्री पत्नीका स्वकीय सचिवलाई पार्टीले टिकट दिएपछि उनी बागी बनेका हुन् ।

यता, डडेलधुरामा प्रतिनिधिसभा र प्रदेशसभातर्फ ५ जनाले उमेदवारी फिर्ता लिएका छन् । मुख्य निर्वाचन अधिकृतको कार्यालयका अनुसार प्रतिनिधिसभातर्फ उमेदवारी दर्ता गरेका तीन र प्रदेशसभातर्फ उमेदवारी दिएका दुई जनाले फिर्ता गरेका हुन् ।

डडेल्धुराका मुख्य निर्वाचन अधिकृत बालकृष्ण वाग्लेका अनुसार प्रतिनिधिसभातर्फ एमाले उमेदवार चक्र स्नेही, स्वतन्त्र (कांग्रेसका बागी) दानबहादुर पाल र राष्ट्रिय प्रजातन्त्र पार्टी नेपालका कालीप्रसाद जोशीले उमेदवारी फिर्ता लिएका छन् । एमाले केन्द्रले नै स्नेहीको उमेदवारी फिर्ता गर्न लगाएको एमाले डडेल्धुराका सचिव गजेन्द्र शाहीले बताए । यसबाट देउवालाई धक्का लागेको छ ।

उम्मेदवारी फिर्तासँगै अब कांग्रेस बीपीसँग प्रदेश र प्रतिनिधिसभा निर्वाचनमा तालमेल हुने पक्का छ । यद्यपि बागी उम्मेदवारी दर्ता गराएका एमाले नेता विक्रमबहादुर शाहीले भने उम्मेदवारी फिर्ता लिएका छैनन् । यस्तै प्रदेशसभा १ मा कांग्रेस बीपीका गणेशप्रसाद जोशी र प्रदेशसभा २ मा राष्ट्रिय प्रजातन्त्र पार्टी नेपालका जयराज अवस्थीले उम्ममेदवारी फिर्ता लिएका छन् ।

प्रतिनिधिसभातर्फ ३ जनाले उमेदवारी फिर्ता लिएसँगै आगामी मंसिर ४ गते हुने प्रतिनिधिसभा सदस्य निर्वाचनका लागि डडेल्धुरामा प्रधानमन्त्री तथा कांग्रेस सभापति देउवासहित ८ जना उम्मेदवारबीच प्रतिस्पर्धा हुने भएको छ । देउवासँगै प्रतिनिधिसभा सदस्य पदमा नेपाली कांग्रेस बीपीबाट कर्णबहादुर मल्ल लड्दैछन् । उनले एमालेको साथ पाएपछि प्रधानमन्त्री देउवालाई चुनाव जित्न मुस्किल हुने देखिएको छ ।