पौडेलको कमाण्डमा गठबन्धनका दलहरुले सातै प्रदेशमा संयुक्त भेला गर्ने

२८ असोज, काठमाडौं । सत्तारुढ गठबन्धनले नेपाली कांग्रेसका वरिष्ठ नेता रामचन्द्र पौडेलको नेतृत्वमा प्रतिनिधिसभा र प्रदेशसभा निर्वाचनको केन्द्रीय परिचालन कमिटी गठन गरेपछि उनकै नेतृत्वमा सातै प्रदेशमा संयुक्तको भेला आयोजना गरिने भएको छ ।

सत्ता गठबन्धनले प्रदेशसभा र प्रतिनिधिसभा निर्वाचन परिणाम आफ्नो पक्षमा पार्न सातै प्रदेशमा संयुक्त कार्यकर्ता भेला गर्ने भएको हो । बिहीबार प्रधानमन्त्री निवास बालुवाटारमा बसेको गठबन्धन बैठकले कात्तिक पहिलो साता सातै प्रदेशमा शीर्ष नेताहरूको उपस्थितिमा प्रमुख नेता तथा कार्यकर्ताको भेला राख्ने निर्णय गरेको हो । भेला मतदाता लक्षीत रहने छ ।

जिल्ला संयन्त्रले आवश्यकताअनुसार निर्वाचन क्षेत्र तथा स्थानीय तहमा यस्तो समिति गठन गर्ने र चुनाव लक्षीत कार्यक्रमहरु गर्ने छ । आगामी चुनावलाई लक्षित गर्दै सातै प्रदेशमा कार्यकर्ता भेला अन्तर्गत पोखरा, बुटवल, विराटनगर, जनकपुर, धनगढी, सुर्खेत, काठमाडौं रहेका छन् । भेलामा पार्टीका केन्द्रीय सदस्य, पार्टी प्रदेश कमिटीका पदाधिकारी, जिल्ला प्रमुखसहित ३–३ जना सहभागी हुने छन् ।

गण्डकी प्रदेशको कात्तिक ४ गते पोखरामा हुने भेलाको व्यवस्थापनको जिम्मेवारी नेकपा एकीकृत समाजवादीको भागमा परेको छ । त्यसैगरी कात्तिक ४ नै लुम्बिनीको बुटवलमा, कात्तिक ५ गते प्रदेश १ को भेला विराटनगर, कात्तिक ५ मा मधेस प्रदेशको जनकपुरमा भेला आयोजना गरिने छ । जसको व्यवस्थापनाको जिम्मेवारी नेपाली कांग्रेसको भागमा परेको छ । जनकपुरमा आयोजना हुने भेलामा लोकतान्त्रिक समाजवादी पार्टी (लोपसा) पनि आमन्त्रण गरिएको छ ।

कातिक ६ गते सुदूरपश्चिमको धनगढी र कात्तिक ७ गते वागमतीको काठमाडौंमा आयोजना हुने भेला माओवादीले आयोजना गर्नेछ । त्यसैगरी कात्तिक ६ गते कांग्रेसको व्यवस्थापनमा कर्णाली प्रदेशको भेला सुर्खेतमा हुनेछ । यस्तै गठबन्धनले केन्द्र, प्रदेश र जिल्ला तहमा निर्वाचन परिचालन समन्वय समिति पनि गठन गर्ने भएको छ ।

संविधानको रक्षा, स्थिरता र समृद्धिका लागि गठबन्धन बनाएको दाबी गर्दै आएका सत्तारुढ दलहरूले निर्वाचनमा गठबन्धनलाई भोट दिएर जिताउन जनतालाई संयुक्त अपिल गर्न संयुक्त भेला गर्न लागेका हुन् ।

कांग्रेस नेतृत्वको गठबन्धनका पक्षमा मतदानका लागि जनतालाई गरिने अपिल तयार गर्न कार्यदल पनि बनाइएको छ । जसमा कांग्रेसबाट प्रकाशशरण महत, माओवादी केन्द्रबाट हितमान शाक्य, नेकपा एकीकृत समाजवादीबाट प्रमेश हमाल र राष्ट्रिय जनमोर्चाबाट हिमाल पुरी छन् ।