झापा-१ का मतदाताको रोजाइमा विश्वप्रकाश कि अग्नि खरेल ?

२८ असोज, बिर्तामोड । आगामी मंसिर ४ का लागि तोकिएको प्रदेश र प्रतिनिधिसभा सदस्यको निर्वाचनमा झापाको क्षेत्र न. १ मा सत्ता गठबन्धन र विपक्षी एमालेका उम्मेदवारबीचको चुनावी प्रचार अभियान रोचक बन्दै गइरहेको छ । सत्ता गठबन्धनका तर्फबाट नेपाली कांग्रेसका महामन्त्री विश्वप्रकाश शर्मा तेस्रो पटक चुनाव लड्दैछन् ।

विपक्षी एमालेका तर्फबाट नयाँ उम्मेदवार पूर्वमन्त्री अग्नी खरेल प्रतिस्पर्धामा छन् । खरेल नयाँ हुन भने शर्माको यो तेस्रसो पटक हो । एमाले अध्यक्ष केपी शर्मा ओली निकट मानिएका खरेल कानून व्यवसायका क्षेत्रमा परिचित छन् भने शर्मा बौद्धिक राजनीतिक कर्मीका रुपमा परिचित छन् । लोकप्रियताका हिसावले पनि शर्मा खरेलभन्दा अगाडी छन् ।

लोकप्रियता र बौद्धिकको भन्दा पनि चुनावमा कस्ले बाजी मार्ने भन्ने विषय आम मतदाताको हातमा रहन्छ । त्यसैले पनि अहिले दुबै उम्मेदवार आफ्नो पक्षमा मत बढाउन अनेकन उपायहरु अपनाइरहेका छन् । यहाँका मतदाताका लागि शर्मा नयाँ होइनन् । २०७४ को निर्वाचनमा शर्मा तत्कालिन बाम गठबन्धनका उम्मेदवार राम कार्कीसँग पराजित भएका थिए ।

कांग्रेसहितका सत्ता गठबन्धनका दलहरूको साथ, राजनीतिक रूपमा निरन्तर अग्लिँदै गएको आफ्नै व्यक्तित्वको बलमा महामन्त्री शर्माले बलियो संगठन भएको र क्षेत्रमा रहेको स्थानीय सत्ताको नेतृत्व गरेर बसेको एमालेका खरेलसँग प्रतिस्पर्धा गर्नुपर्नेछ ।

झापा–१ मा दुबै प्रतिस्पर्धी ढुक्क हुने अवस्थामा छैनन् । आफ्नो क्षेत्रको लाभ शर्मालाई होला तर यहाँ परम्परागत जनमतका हिसाबले एमाले बलियो छ । त्यसको लाभ खरेलले पाउँछन् । शर्मालाई आफ्नो लोकप्रियता र स्थानीय उम्मेदवार भएको आधारमा एमालेको ठूलो जनमत आफूतिर तान्नुपर्ने चुनौती छ ।

२०७४ को चुनावमा यो क्षेत्रमा वाम गठबन्धन झन्डै १४ हजार मतान्तरले अघि थियो । तर, चुनावी परिणाम सार्वजनिक हुँदा शर्माले उल्लेख्य आकारमा घटाएका थिए । त्यसबेला राम कार्कीले ३६ हजार १७३ मत पाएर जित्दा शर्माले ३३ हजार ३१० मत पाएका थिए । यसरी १४ हजारले पछि परेको क्षेत्रमा शर्माले भने २ हजार ८६३ मतले मात्रै पराजय व्यहोरेका थिए ।

कांग्रेस नेताहरू स्थानीय चुनावको गणित शर्माले बदल्ने दाबी गर्छन् । जनप्रतिनिधि नहुँदै पनि उनले यो क्षेत्रको विकासमा उल्लेख्य योगदान दिएको र त्यसबारे जनता जानकार रहेको कांग्रेसीको दाबी छ । स्थानीय चुनावको गणितले काम गर्दैन भन्ने २०७४ सालमै देखिसकेको छ ।

शर्माले जनप्रतिनिधि नहुँदै पनि क्षेत्रको विकास निर्माणमा नेतृत्वदायी भूमिका निर्वाह गरेका छन् । धेरै कामको अगुवाइ गरेका शर्माप्रति जनविश्वास उच्च रहेको दाबी स्थानीयको छ । कांग्रेसका समर्थकहरूले यस क्षेत्रमा अहिले विश्वप्रकाशले जिते कांग्रेसमा ‘गगन–विश्व’ को पुस्ता नै प्रधानमन्त्री बन्ने अवस्था सिर्जना हुने र त्यसले परिवर्तनको सुरूआत हुने नारा लगाइरहेका छन् ।

एमालेहरू पनि खरेल ओलीको विश्वासपात्र भएकाले ओली प्रधानमन्त्री हुँदा उनी मन्त्री बन्ने प्रचार गरिरहेका छन् । एमाले नेताहरूको पनि दाबी उस्तै छ । खरेलले विकासका काममा नेतृत्व गर्ने क्षमता राख्ने उनीहरूको दाबी छ । जनतालाई बुझाउने काम भइरहेको छ । पार्टीको संगठन र स्थानीय चुनावको मतले पनि खरेलको पक्षमा बलियो माहोल रहेको दाबी उनीहरुको छ ।

गएको स्थानीय चुनावमा मेचीनगरको मेयरमा शर्माले टिकट खोसेका कृष्णप्रसाद सिटौलानिकट पार्टीका जिल्ला उपसभापति केशवराज पाण्डे लगायतको समूहलाई साथैमा लिएर हिँड्नुपर्ने चुनौती उनीसँग छ । प्रदेशसभाको क्षेत्र क मा सिटौला र पाण्डेकै विश्वासपात्र गोपाल तामाङलाई अघि सारेर शर्माले सन्तुलन मिलाउने प्रयास गरेका छन् । शर्माको प्रस्तावक पाण्डे स्वयं बसेका छन् ।

यो क्षेत्रमा बलियो प्रभाव राख्ने एमाले नेता रवीन कोइराला र उनका समर्थकहरूको चिढिएको मन मिलाउनुपर्ने चुनौती खरेललाई छ । कोइरालाले टिकट नपाएर खरेलले पाएपछि कोइराला समर्थक धेरैले सामाजिक सञ्जालमा पाहुनालाई अस्वीकार गर्नेसमेत बताएका छन् ।