नेपाली कांग्रेसका तीन मन्त्रीलाई मुख्यमन्त्री राउतले गरे बर्खास्त

२८ असोज, जनकपुर । मधेस प्रदेशका मुख्यमन्त्री लालबाबु राउतले नेपाली कांग्रेसका मन्त्रीहरूलाई बर्खास्त गरेका छन् । उनले संघीय सरकारले आफ्नो पार्टीका मन्त्रीहरुलाई बर्खास्त गरेको बदलामा मधेश प्रदेश सरकारमा रहेका कांग्रेसका  तीन मन्त्रीलाई बखास्त गरेका हुन् ।

प्रधानमन्त्री शेरबहादुर देउवाले बिहीबार जनता समाजवादी पार्टी (जसपा) का चार मन्त्रीहरूलाई हटाएका थिए । यसको बदलामा राउतले प्रदेश सरकारमा रहेका कांग्रेसका तीनजना मन्त्रीलाई शुक्रबार हटाएका हुन् ।

प्रदेश सरकारमा कांग्रेसका रामसरोज यादव भौतिक पूर्वाधार तथा यातायात, वीरेन्द्र सिंह महिला बालबालिका तथा खेलकुद र ओमप्रकाश शर्मा खानेपानी तथा ऊर्जा मन्त्री थिए । मुख्यमन्त्री राउतले बिहीबार बेलुका नै तीनै जनालाई फोन गरी राजीनामा गर्न आग्रह गरे पनि नमानेपछि तीनै जनालाई बर्खास्त गरिएको मुख्यमन्त्री तथा मन्त्रिपरिषदको कार्यालयले जनाएको छ ।

तीनै जनालाई पदमुक्त गरिएको पत्र मुख्यमन्त्रीले प्रदेश प्रमुखलाई पठाएपछि उनीहरु बर्खास्तमा परेका हुन् । रिक्त भएका तीनै मन्त्रालय अब मुख्यमन्त्रीले आफैंले सम्हाल्ने भएका छन् । सत्ता गठबन्धनकै अरू दुई घटक नेकपा (एकीकृत समाजवादी) र माओवादीका मन्त्रीलाई भने मुख्यमन्त्री राउतले निरन्तरता दिएका छन् ।

मधेस प्रदेशमा जसपा‚ नेपाली कांग्रेस‚ नेकपा (माओवादी केन्द्र) र नेकपा (एकीकृत समाजवादी) को संयुक्त सरकार थियो । जसपा विभाजित भएपछि लोकतान्त्रिक समाजवादी पार्टी रोजेका मन्त्रीहरूलाई हटाएर यी दलहरूलाई पालैपालो मुख्यमन्त्री राउतले प्रदेश सरकारमा सामेल गराएका थिए ।

माओवादी केन्द्रका तर्फबाट भरतप्रसाद साह गृह तथा सञ्चार मन्त्री र रूबी कर्ण राज्यमन्त्री छन् । त्यसैगरी एकीकृत समाजवादीका तर्फबाट शत्रुधन महतो उद्योग‚ वन‚ पर्यटन तथा वातावरण र प्रमोद यादव प्रदेश सभा तथा कानुन मन्त्री छन् ।