सरकारले थप्यो सत्य निरूपण र बेपत्ता आयोगको म्याद

२८ असोज, काठमाडौं ।  सरकारले सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगको म्याद थप गर्ने निणर्य गरेको छ । शुक्रबार बिहान बसेको मन्त्रिपरिषद्को बैठकले बेपत्ता पारिएका व्यक्तिको छानविन, सत्यनिरुपण तथा मेलमिलाप आयोगको म्याद थप गरेको हो ।

सरकारका प्रवक्ता एवम् सञ्चारमन्त्री ज्ञानेन्द्रबहादुर कार्कीले मन्त्रिपरिषद् बैठकले बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोग ऐन २०७१ को दफा ४२ बमोजिम सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगको कार्यावधि २०८० असार मसान्तसम्म थप गर्ने बाधा अड्काउ फुकाउ आदेश जारी गर्ने निणर्य गरेको जानकारी दिए ।

दस वर्षे सशस्त्र द्वन्द्वका समस्या समाधानका लागि गठित आयोगहरूको म्याद सकिन लाग्दा आयोगहरूमा परेका हजारौं उजुरी र तिनमाथि हालसम्म भएका अनुसन्धानको अवस्थाबारे प्रश्न उठ्ने अवस्था थियो । सरकारले यसअघि पनि आयोगको म्याद सकिन लागेकोमा तीन महिना म्याद थप गरेर त्यसबारे कानुन संशोधनको प्रक्रिया अघि बढाएको थियो ।

तर, त्यसबारेको विधेयक प्रतिनिधिसभाबाट पास हुन सकेको छैन । ०७१ मा दुई वर्षका लागि भनेर गठन भएका दुवै आयोगको अघिल्लो कार्यकाल चार वर्षसम्म चलेको थियो । त्यसयता पटक–पटक म्याद थप हुँदै आएको छ ।