सभापति देउवालाई कांग्रेसमा भन्दा गठबन्धनमा अन्तर्घात हुने डर

२९ असोज काठमाडौं । प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले आगामी प्रदेश र प्रतिनिधिसभाको निर्वाचनमा अन्तर्घात भए चुनावमा राम्रो परिणाम ल्यान कठिन हुने आशंका व्यक्त गरेका छन् । उनले नेपाली कांग्रेसभित्र भन्दा गठबन्धनभित्र अन्तर्घात भए त्यसले कांग्रेसलाई ठूलो क्षति हुने अनुमान पनि गरेका छन् ।

कांग्रेस सहमहामन्त्री जीवन परियारका अनुसार देउवाले गठबन्धनका कारण चाहेको व्यक्तिलाई टिकट दिन नसकिएको भन्दै अन्तर्घात मौलाउने खतराप्रति सबैलाई सजग रहन आग्रह गरेका छन् । देउवाले केन्द्रीय कार्यसम्पादन समितिको बैठकमा पार्टीभित्र पनि अन्तर्घात बढ्ने सम्भावना देखिएको भन्दै चिन्ता व्यक्त गरेका थिए ।

उनले गठबन्धनमा नजाँदा चुनाव जित्न र सरकार बनाउन नसकिने र जाँदा सबैको चित्त बुझाउन नसकिने अवस्थाले अन्तर्घात बढाउने स्थिति देखिएको भन्दै यसलाई रोक्न सबै लाग्नुपर्ने बताएका थिए । देउवाले आसन्न निर्वाचनमा सत्ता गठबन्धनलाई सफल बनाउन बैठकमा आग्रह गरेका थिए । उनले गठबन्धनको पक्षमा जनलहर सिर्जना हुने गरी माहोल बनाउन र पार्टी पंक्तिलाई परिचालन गर्न निर्देशन पनि दिएका थिए ।

परियारका अनुसार देउवाले गठबन्धनका कारण कांग्रेसभित्रै अन्तर्घात नभए कांग्रेसले पनि राम्रो चुनावी परिणाम हासिल गर्ने बताएका थिए । ‘गठबन्धन भएको छ, सीटको बाँडफाँड हुँदा कतै पाइएको छ, कतै छोड्नु परेको छ । गठबन्धन र पार्टीभित्र अन्तर्घात नभए राम्रो परिणाम आउँछ भन्ने लागेको छ ।’

पार्टीभित्र गठबन्धनको पक्षमा माहोल बनाउन प्रधानमन्त्री देउवाले विगतमा तत्कालीन प्रधानमन्त्री केपी ओलीले संसद विघटन गरेको र चुनावको मिति घोषणा गर्दा आफूले निर्वाचनमै जानुपर्ने धारणा राखेको समेत स्मरण गरे । ‘म त पहिल्यै निर्वाचनको पक्षमा थिएँ, मलाई तपाईंहरूले नै यतातिर तानेर ल्याउनुभएको हो, त्यसपछिको परिबन्दले यो गठबन्धन बनेको हो । अब बाध्यताले बनेको गठबन्धनलाई सफल बनाउनुपर्ने अवस्था छ । सबैले लाग्नुपर्छ ।’ परियारले बताए ।