रुपन्देही–२ मा तत्कालका लागि गुरुङको उम्मेदवारी कायम

३० असोज, काठमाडौं । सर्वोच्च अदालतले रुपन्देही २ मा तत्कालका लागि राजु गुरुङको उम्मेदवारी कायम राख्न आदेश गरेको छ । रुपन्देही निर्वाचन क्षेत्र नम्बर २ मा सत्तारुढ गठबन्धनबाट नेकपा एकीकृत समाजवादीका उम्मेदवार राजु गुरुङको उम्मेदवारी खारेज गर्ने निर्णय तत्कालका लागि कार्यान्वयन नगर्न सर्वोच्च अल्पकालीन अन्तरिम आदेश जारी गरेको हो ।

न्यायाधीश विश्वम्भरप्रसाद श्रेष्ठको एकल इजलासले गुरुङको उम्मेदवारी खारेजी गर्ने निर्वाचन अधिकृत कार्यालयको निर्णय कार्यान्वयन नगर्न अल्पकालीन अन्तरिम आदेश दिएपछि गुरुङको उम्मेदवारी हाललाई कायम रहेको छ । निर्वाचन अधिकृतको कार्यालयले रुपन्देही २ ले उम्मेदवार गुरुङ संलग्न कम्पनी कालोसूचीमा रहेको भन्दै प्रतिनिधिसभा सदस्यको उम्मेदवारी खारेज गरिदिएको थियो ।

निर्वाचन आयोग र उम्मेदवार गुरुङलाई छलफलका लागि सर्वोच्चले बोलाएको छ । तत्कालका लागि गुरुङको उम्मेदवारी कायमै रहेको छ । रुपन्देही २ बाट नेकपा एमालेका उपाध्यक्ष विष्णु पौडेल पनि चुनावी मैदानमा छन् । गुरुङको उम्मेदवारी कायम नरहँदा पौडेलको जित सुनिश्चत जस्तै बनोको थियो ।