निर्वाचनमा अर्कालाई होच्याएर प्रचार गरे कानूनअनुसार कारवाहीः आयोग

३१ असोज, काठमाडौं । निर्वाचन आयोगले प्रदेश र प्रतिनिधिसभा निर्वाचनका क्रममा उम्मेदवार वा अरु कसैले पनि एकअर्कालाई होच्याएर वा गालीगलौज गर्ने खालको प्रचारप्रसार भएको पाइएमा कानूनअनुसार कारवाही गर्ने जनाएको छ ।

निर्वाचन आचारसंहिता पूर्णरूपमा पालना गर्न उमेदवारहरूलाई आग्रह गर्दै निर्वाचन आयोगले पालन नगरे तत्काल कारवाही गर्ने चेतावनी पनि दिएको छ । राजनीतिक दलका उमेदवार तथा स्वतन्त्र उमेदवारले चुनाव प्रचारप्रसार गरेको उजुरी परेसँगै आयोगले निर्वाचन आचारसंहिताको पूर्ण पालना गर्न सचेत गराउँदै कारवाहीको चेतावनी दिएको हो ।

आयोगले आचारसंहिताअनुसार कात्तिक १८ गतेदेखि मात्रै प्रचारप्रसार गर्न पाइने बताएको छ । यसपछि उमेदवारले घरदैलो कार्यक्रम गर्न पाउने र त्यसमा २५ जनाभन्दा बढी सहभागी हुन नपाउने प्रावधानलाई पनि पालना गर्न अयोगले दलहरुलाई निर्देशन दिएको छ ।

प्रचारप्रसारमा जाँदा ठूलो तडकभडक पनि गर्न नपाइने र बाजागाजा र नाचगान जस्ता कुरापनि बन्देज गरिएको जनाइएको छ । घरदैलोमा तामझाम र बाजागाजा गर्नु पनि आचारसंहिता विपरित हुने आयोगको भनाई छ । आचारसंहिताको परिधिभित्र बसेर कानुनी सजाय नपाउनेगरी घरदैलो गर्न आयोगले दलहरुलाई सुझाएको छ ।