काठमाडौंका दुई क्षेत्रमा त्रिपक्षीय भिडन्त, काम लागेन गठबन्धनका शीर्षको उर्दी

३१ असोज, काठमाडौं ।  अगामी मंसिर ४ मा हुने प्रदश र प्रतिनिधिसभाको निर्वाचनमा सत्ता गठबन्धन दलका शीर्ष नेताले देशभर गठबन्धन सहजरुपमा अगाडी बढिरहेको बताएपनि संघीय राजधानी रहेको काठमाडौंकै दुई वटा निर्वाचन क्षेत्रमा गठबन्धनको उर्दी लागु हुन सकेको छैन् । अहिलेसम्म पनि गठबन्धनका शीर्ष नेताहरुले काठमाडौं क्षेत्र न. ३ र क्षेत्र नं १० मा आफ्ना उम्मेदवारहरुलाई मिलाउन सकेका छैनन् ।

काठमाडौंका यी क्षेत्रमा मित्रवत प्रतिस्पर्धा पनि छैन् । गठबन्धनका उम्मेदवारकाबीचमा हाना थापा चलिरहँदा स्वातन्त्रबाट उठेकाहरुलाई फाइदा पुगिरहेको छ । क्षेत्र न. १० र ३ मा चर्किएको विवाद मिलाउन गठबन्धनका शीर्ष नेताहरु नलागेका होइनन् । तर, उनीहरुको भनाई अहिलेसम्म पनि कार्यन्वयनमा आउन सकेको देखिदैन् ।

गठबन्धनका उम्मेदवारबीचको प्रतिस्पर्धाले काठमााडौं क्षेत्र न. ३ मा एमाले उम्मेदवार कृष्णबहादुर राईलाई थप फाइदा पुग्ने देखिदै गएको छ । राई यसअघिको निर्वाचनमा पनि यसै क्षेत्रबाट निर्वाचत भएका थिए । हाललाई हेर्दा क्षेत्र नं. ३ त्रिपक्षीय भीडन्त हुन सक्ने देखिन्छ । तर, यहाँ पनि अन्य दल र स्वतन्त्र उम्मेदवारको कमी छैन् । यो क्षेत्रमा नेकपा एमालेका कृष्णबहादुर राई, नेपाली कांग्रेसका सन्तोष चालिसे र नेकपा माओवादी केन्द्रका बद्रीप्रसाद बजगाईं उम्मेदवार छन् ।

राई यही क्षेत्रबाट निर्वाचित निवर्तमान सांसद् पनि दहुन् । उनले गत निर्वाचनमा वाम गठबन्धनबाट उम्मेदवारी दिएर कांग्रेसकी अम्बिका बस्नेतलाई पराजित गरेका थिए । त्यसबेला राईले १९ हजार १६९ मत पाएका थिए भने कांग्रेसकी बस्नेतले १४ हजार ८८४ मत ल्याएकी थिइन् । कांग्रेस उम्मेदवार चालिसेलाई गठबन्धनमै रहँदा पनि नतिजा हात पार्न कठिन हुने अवस्थामा अहिले त्रिपक्षीय भिडन्त भइरहेको छ ।

यस्तै काठमाडौं क्षेत्र नं. १० मा त्रिपक्षीय भीडन्त छ, नेपाली कांग्रेस, नेकपा एमाले र नेकपा माओवादी केन्द्रको । यहाँ कांग्रेसले राजन केसी, एमालेले हिमेश केसी र माओवादी केन्द्रले अञ्जना बिशंखेलाई उम्मेदवार बनाएका छन् । मुख्य प्रतिस्पर्धा यी नै उम्मेदवारहरूबीच हुन सक्ने देखिन्छ । तर, यहाँबाट प्रतिनिधिसभा सदस्यका लागि १५ राजनीतिक दल र तीन जना स्वतन्त्र उम्मेदवार गरी १८ जनाको उम्मेदवारी छ ।

कांग्रेस उम्मेदवार केसी कांग्रेस केन्द्रीय सदस्य हुन् भने माओवादी केन्द्रकी उम्मेदवार बिशंखे स्थायी समिति सदस्य हुन् । एमालेका युवा नेता केसी पनि स्थानीय युवामाझ लोकप्रिय मानिन्छन् । तर, यो क्षेत्रमा विगतदेखि कांग्रेसले जित्दै आएको छ । २०७४ मा एमाले माओवादी गठबन्धन हुँदा पनि केसी विजयी भएका थिए ।

०७४ मा यहाँबाट केसीले बाम गठबन्धनका उम्मेदवार हितमान शाक्यलाई पराजित गरेका थिए । केसीले २४ हजार १९० मत ल्याउँदा शाक्यले २१ हजार ९०७ मत पाएका थिए । त्यसअघि ०७० मा पनि केसीले नै जितेका थिए । त्यो बेला केसीसँग माओवादी केन्द्रका अध्यक्ष पुष्पकमल दाहालले नै चुनाव हारेका थिए । तर, यसपटक भने क्षेत्रको माहोल फेरिएको एमाले र माओवादी नेताहरूको भनाइ छ ।

यो क्षेत्रमा दक्षिणकाली नगरपालिका, कीर्तिपुर नगरपालिका र चन्द्रागिरि नगरपालिकाका दस वडा (२, ३, ४, ५, ६, ७, ८, ९, १० र ११) यस क्षेत्रमा पर्दछन् । स्थानीय तह निर्वाचनमा भने यी तीनवटै स्थानीय तह नेपाली कांग्रेसले जितेको छ । यी नगरपालिकामा एमाले दोस्रो र माओवादी केन्द्र तेस्रो छन् । अहिले कांग्रेसमा धरै असन्तुष्टि देखिएको छ । अर्कोतर्फ धेरै जना स्वतन्त्र उम्मेदवार पनि रहेका छन् ।

काठमाडौंमा मात्र गठबन्धनको निर्देशन मेचीदेखि महाकालीसम्म नै पालना भएको देखिदैन । सुदूरपश्चिममा पनि उस्तै टकराव छ । कतिपय क्षेत्रमा नेकपा एसले गठबन्धन नमान्ने भन्दै आफ्ना उम्मेदवारहरु उठाएको छ भने माओवादी भित्रै पनि असन्तुष्टि चुलिएर आएको छ ।