निर्वाचनमा उचित सुरक्षा व्यवस्था मिलाउन प्रहरीलाई प्रधानमन्त्रीको निर्देशन

३१ असोज का ठमाडौं । प्रधानमन्त्री शेरबहादुर देउवाले आगामी मंसिर ४ मा हुने आम निर्वाचनको उचित सुरक्षा व्यवस्था मिलाउन प्रहरीका सबै संगठनलाई निर्देशन दिएका छन् । उनले प्रहरी संगठनलाई आधुनिक र प्रविधिमैत्री बनाउँदै लैजान पनि निर्देशन दिएका छन् ।

सोमबार ६७ औँ प्रहरी दिवसको अवसरमा प्रहरी प्रधान कार्यालयमा भएको कार्यक्रमलाई सम्बोधन गर्दै उनले निर्वाचनमा उचित सुरक्षा व्यवस्था मिलाउन निर्देशन दिएका हुन् । देउवाले ऐन, कानुनले दिएको आफ्नो अधिकार प्रयोग गरी निर्वाचनलाई सम्पन्न गर्न आवस्यक रहेको बताए । उनले हाल नेपाल प्रहरीले सीमित श्रोत, साधन, कठिनाइका बीच पनि जिम्मेवारी पुरा गर्नुपर्ने बताए ।

प्रधानमन्त्री देउवाले भएका श्रोत, साधनको प्रयोग गरी निर्वाचनलाई भइरहित र सुरक्षाको दृष्टिले अब्बल बनाउने कार्यमा लाग्न निर्देशन दिए । स्थानीय निर्वाचनमा नेपाल प्रहरीले खेलेको भूमिका प्रशंसायोग्य रहेको भन्दै देउवाले आगामी मंसिर ४ गते हुन गइरहेको प्रतिनिधि तथा प्रदेशसभाको निर्वाचन, निष्पक्ष, स्वतन्त्र वातावरणमा सम्पन्न गराउन प्रहरी संगठन सक्षम रहने विश्वास व्यक्त गरे ।

प्रधानमन्त्री देउवाले सूचना प्रविधिलाई समायानुकूल परिवर्तन गरी अघि बढ्नसके मात्रै अपेक्षित परिणाम हासिल गर्न सकिने बताए । उनले प्रहरीलाई आगामी दिनमा थप आधुनिक, व्यावसायिक, श्रोत, साधनले सम्पन्न बनाउन सरकार प्रतिवद्ध रहेको पनि बताए । प्रधानमन्त्री देउवाले प्रहरी प्रशासनले हरेक समय नेपाली नागरिकको सुरक्षालाई प्राथमिकतामा राखेर काम गरेको भन्दै धन्यवाद व्यक्त गरे ।

प्रहरीका सबै संगठनलाई प्रविधिमैत्री बनाउँदै लैजान निर्देशन दिन चाहन्छु, भन्दै देउवाले भने, ‘नेपाल प्रहरीलाई आगामी दिनमा थप आधुनिक, व्यावसायिक, श्रोत, साधनले सम्पन्न बनाउन सरकार प्रतिवद्ध छ । आवश्यक सहयोग जुटाउनका लागि जानकारी पनि गराउनुपर्छ ।’
उनले प्रहरीभित्र सबै कर्मचारीको वृत्ति विकासलाई समयानुकूल सुधार गर्दै जानुपर्ने आवश्यकता रहेको पनि उल्लेख गरे । प्रधानमन्त्री देउवाले आगामी निर्वाचन शान्तिपूर्ण रुपमा गराउनेबारेमा प्रहरीको प्रमुख जिम्मेवारी रहने भन्दै ऐन, कानुनले दिएको आफ्नो अधिकार प्रयोग गरी निर्वाचनलाई स्वच्छ, निष्पक्ष बनाउन निर्देशन दिए ।