सत्ता गठबन्धनले सातै प्रदेशमा गर्ने भनिएको संयुक्त सभा कार्यक्रम अन्योलमा

३१ असोज, काठमाडौं ।  सत्ता गठबन्धनमा आवद्ध दलहरुले कात्तिक पहिलो साता सातै प्रदेशमा गर्ने भनिएको संयुक्त सभा अन्योलमा परेको छ । निर्वाचन आयोगले कात्तिक १७ गतेभन्दा अगाडी कुनै पनि कोणसभा, आमसभा, गोष्ठी, सेमिनारलगायतका कार्य गर्न नपाइने निर्णय गरेपछि संयुक्त सभा अन्योलमा परेको हो ।

सत्तारुढ गठबन्धनले नेपाली कांग्रेसका वरिष्ठ नेता रामचन्द्र पौडेलको नेतृत्वमा प्रतिनिधिसभा र प्रदेशसभा निर्वाचनको केन्द्रीय परिचालन कमिटी गठन गरी उनकै नेतृत्वमा सातै प्रदेशमा संयुक्तको भेला आयोजना गर्ने तयारी गरेको थियो । तर, निर्वाचन आचासंहितालाई टेकेर निर्वाचन आयोगले यस्ता कुनै पनि गतिविधि गर्न नदिने निर्णय गरेको छ ।

प्रतिनिधिसभा र प्रदेशसभा निर्वाचनका लागि मतदानको १९ दिन अघिसम्म राजनीतिक दल र उम्मेदवारहरूले कोणसभा र आमसभा गर्न नपाउने निर्णय भएको निर्वाचन आयुक्त रामप्रसाद भण्डारीले बताएका छन् । दलहरुले आयोगको निर्णय विपरति गरेका निर्वाचन आचारसंहिता उल्लंघन हुने र उम्मेदवारको मनोनयन खारेजसम्मको कठोर निर्णयमा आयोग पुग्ने चेतावनी भण्डारीले दिएका छन् ।

निर्वाचन आयुक्त भण्डारीले सोमबार निर्वाचन आचारसंहितामा मतदानको १७ दिनअघि मात्रै दल तथा उम्मेदवारहरूले कोणसभा, आमसभा, सेमिनार गोष्ठी गर्न पाउने व्यवस्था राजनीतिक दलहरूको समर्थनमा राखिएको बताए । अहिलेको बेलामा कोणसभा, आमसभा लगायतका गोष्ठी, सेमिनारलगायतका कुनै पनि विषय निर्वाचन प्रचारप्रसार गर्न नपाइने उनको भनाइ छ ।

उम्मेदवार र राजनीतिक दलहरूले अहिलेको अवस्थामा २५ जनासम्मको समूहमा मतदाताको घरदैलो कार्यक्रम गर्न सक्ने उनले बताए । अहिले घरदैलको क्रममा पनि राजनीतिक दलहरूले निर्वाचन आचारसंहिता उल्लंघन गरेको भन्दै उजुरी आइरहेको उनको भनाइ छ । थुप्रै ठाउँबाट घरदैलो जाँदा तामझाम, भोजभतेर जस्ता कुरा सुरु भएपपछि आयोगले कडाइ गरेको हो ।

निर्वाचन प्रचारप्रसारका क्रममा आचारसंहिता उल्लंघन भएमा आयोगले कठोर कारबाही गर्ने आयुक्त भण्डारीको चेतावनी छ । ’निर्वाचन प्रचारप्रसारका क्रममा आचारसंहिता उल्लंघन गरिए आयोगले कठोरतापूर्वक उनीहरूलाई कारबाही गर्नेछ । त्यो कारबाहीको विषय कतिसम्म होलाभन्दा मनोनयन पत्र खारेज पनि हुनसक्ने बताइएको छ ।

सत्ता गठबन्धनले तीनसिदन अगाडी नै प्रदेशसभा र प्रतिनिधिसभा निर्वाचन परिणाम आफ्नो पक्षमा पार्न सातै प्रदेशमा संयुक्त कार्यकर्ता भेला गर्ने तयारी गरेको थियो । बिहीबार प्रधानमन्त्री निवास बालुवाटारमा बसेको गठबन्धन बैठकले कात्तिक पहिलो साता सातै प्रदेशमा शीर्ष नेताहरूको उपस्थितिमा प्रमुख नेता तथा कार्यकर्ताको भेला राख्ने निर्णय गरेको थियो । उक्त भेला अब अनिश्चित भएको छ ।