बागीलाई कांग्रेस भन्यो, ‘धेरै सिट जित्ने लक्ष्यले थोरै उम्मेदवारी दिनुपर्दा यस्तो भयो’

३१ असोज, काठमाडौं । नेपाली कांग्रेसका बागी उम्मेदवारहरुलाई उम्मेदवारी निष्क्रिय पारेर पार्टीलाई सघाउन आग्रह गरेको छ । बागी उम्मेदवारहरुलाई उम्मेदवारी निष्क्रिय पारेर सत्ता गठबन्धनका आधिकारिक उम्मेदवारहरुलाई समर्थन गर्न कांग्रेसले दोस्रो पटक आग्रह गरेको हो । कांग्रेसले धेरै सिट जित्ने लक्ष्यले थोरै उम्मेदवार दिनुपर्ने बाध्यता आइपरेको स्पष्ट पारेको छ ।

सोमबार सानेपास्थित केन्द्रीय कार्यालयमा पत्रकार सम्मेलन गर्दै प्रवक्ता महतले बागी उम्मेदवारहरुलाई कांग्रेसले धेरै सिटमा जित निकाल्नका लागि गठबन्धन गर्नुपरेको यथार्थलाई बुझ्न आग्रह गरे । ’बागी उम्मेदवारलाई उम्मेदवारी निष्क्रिय पारेर आधिकारिक उम्मेदवारहरुलाई समर्थन गर्न समय दिइएको छ । अब धेरै पर्खन र कुर्न सकिँदैन । साथीहरूले पार्टीको नीति मान्नुहुनेछ भन्ने लाग्छ,’ उनले भने ।
प्रवक्ता महतले गठबन्धनले मुलुकलाई ठुलो दुर्घटना हुनबाट जोगाएर संविधान र व्यवस्थामाथिको जोखिमलाई ट्र्य्राकमा ल्याएको दाबी गरे । उनले कांग्रेसले अन्य दलहरुले जस्तो धेरै बोल्ने, तर काम नगर्ने चरित्र नअपनाएको भन्दै कांग्रेस नेतृत्वको गठबन्धनलाई जनताले आफ्नो विश्वासको मत दिनेमा ढुक्क रहेको बताए ।

गठबन्धनका कारण योग्य हुँदाहुँदै पनि धेरै क्षमतावान साथीहरूलाई उम्मेदवार बनाउन नसकेको उनले उनले बताए । उनले एउटा परिस्थितिमा गठबन्धन सरकार बनेको उल्लेख गर्दै छोटो अवधिमा देशलाई एउटा अर्डरमा ल्याएको उनले दाबी गरे । जनताका इच्छा र माग सम्बोधन भएको बताउँदै उनले स्थानीय तह निर्वाचन सम्पन्न भएको उल्लेख गरे ।

नेता महतले जसपालाई कांग्रेसले उदारता देखाए पनि बाहिरिएकोमा कुनै कमेन्ट नगर्ने बताए । निर्वाचन आयोगले तयार गरेको आचारसंहिता धेरै रेष्टिक्टेड रहेको, धेरै सीमा राखिएकाले विगतमा गरेजसरी प्रचार गर्न सम्भव नभएको उल्लेख गरे । तर पनि आचारसंहिताको सीमामा रहेर प्रचार गर्ने उनले बताए ।

कांग्रेसले धेरै नबोल्ने बरु काम गरेर देखाउने भन्दै देशभर कांग्रेस र गठबन्धनको उम्मेदवारको पक्षमा माहोल तयार भएको, जिल्ला जिल्लामा गठबन्धनको निर्वाचन परिचालन समिति गठन भइरहेको र सातै प्रदेशमा गठबन्धनका शीर्ष नेताले सम्बोधन गर्ने उनको भनाइ छ । नेता महतले दुई दिनभित्रै सत्ता गठबन्धनको संयुक्त अपिल सार्वजनिक हुने जानकारी दिए । उनले वर्तमान सरकारले निष्पक्ष र भयरहित वातावरणमा चुनाव हुने अवस्था सिर्जना गरेको दाबी गरे ।

प्रवक्ता महतले चुनावपछि कांग्रेसकै नेतृत्वको गठबन्धनको सरकार हुनेसमेत बताए । ’हामी धेरै बोल्दैनौँ । कांग्रेस धेरै कुरा गर्ने होइन, काम गरेर देखाउने पार्टी हो विपक्षी पार्टीहरूजस्तो हल्ला गर्ने, काम नगर्ने पार्टी होइन,’ उनले भने, ’हामी देश र जनतालाई केन्द्रमा राखेर काम गर्छौँ । मुलुकको हित हाम्रो प्राथमिकतामा हुन्छ ।’

उनले सत्ता गठबन्धनले नेपालको स्वार्थ र आवश्यकता केन्द्रित विदेश नीति अपनाउने बताए । ’गठबन्धन दलहरूबीच कतिपय विषयमा न्युनतम साझेदारीको कुरा छ । हामी नेपालको स्वार्थ र आवश्यकतालाई केन्द्रमा राखेर विदेश नीति बनाउँछौँ, त्योभन्दा बाहिर विदेश नीति हुँदैन,’ उनले भने ।