सबै दलमा बागीको विगविगी, हाम्राबाटै राम्रालाई चुनौती

१ कात्तिक, काठमाडौं । आगामी मंसिर ४ गते हुन गइरहेको प्रदेश र प्रतिनिधिसभा सदस्यको निर्वाचनमा दलबाट टिकट नपाएर असन्तुष्ट बनेकाहरुले दिएको बागी उम्मेदवारी यतिबेला सबै राजनीतक दलहरुका लागि समस्याको रुपमा देखा परेको छ । बागीका कारण दलका राम्रा र योग्य उम्मेदवारहरु पनि पराजित हुनसक्ने अवस्था खडाहुँदै गएको छ ।

पछिल्लो समय कांग्रेसका बागी स्वयं कांग्रेसका लागि मात्र नभएर गठबन्धनमा रहेका दलहरुका लागि पनि समस्याको रुपमा देखिन थालेका छन् । बागी उम्मेदवारी दिने कांग्रेसमा बढी भएपनि बागी नभएका कुनै दल छैनन् । कतिपय गठबन्धनका उम्मेदवारलाई गठबन्धनकै बागीले पछार्ने अवस्थासमेत देखिएको छ । सबै दलले बागीलाई उम्मेदवारी फिर्ता नगरे कारवाही गर्ने चेतावनी दिएका छन् ।

पार्टीले दिएको कारवाहीको चेतावनीले बागीलाई खासै असर गरेको देखिदैन् । सत्ता गठबन्धनमा रहेका दलहरु नेपाली कांग्रेस,नेकपा माओवादी, नेकपा एकीकृत समाजवादी सबैमा बागी छन् । पार्टीको निर्देशनपछि केहीले उम्मेदवारी फिर्ता लिएपनि धेरैले कायमै राखेका छन् । नेकपा माओवादीले सोमबार देशभरका बागीलाई उम्मेदवारी फिर्ता लिन सर्कुलर जारी गरेको थियो । तर, कसैले टेरेका छैनन् ।

नेपाली कांग्रेसले आफ्नो पार्टीका बागी उम्मेदवारी दिएकाहरुलाई पटक पटक फिर्ता लिएर निष्क्रिय बनाउन भनिरहेको छ तर, उनीहरुले मानिरहेका छैनन् । यसले पनि पार्टीमा सही व्यक्तिले टिकट नपाएर गलतलाई नेतृत्वले प्रोत्सााहन गरेको देखिएको छ । यतिबेला बागी सबैका लागि टाउको दुखाई बनेका छन् ।

बागीले सबैभन्दा धेरै नेकपा एसका उम्मेदवारहरु प्रभावित देखिएका छन् । सत्ता गठबन्धनमा प्रतिनिधिसभाको १९ सिट पाएको एकीकृत समाजवादीले ७ क्षेत्रमा कांग्रेसका बागी उम्मेदवार सामना गरिरहेको छ । एकीकृत समाजवादीका झन्डै आधा उम्मेदवार यतिबेला कांग्रेसका बागीका कारण खतराको रेखाभित्र छन् ।

अझ प्रदेशसभातर्फ सत्ता गठबन्धनभित्र देशैभर बग्रेल्ती बागी उम्मेदवार छन् । सबैभन्दा बढी बागी कांग्रेसका छन् । कैलाली २ (२) मा माओवादीका राजेन्द्र साउदविरुद्ध कांग्रेसका स्थानीय नेता भरत शाह उठेका छन् । कैलाली ३ (२) मा एकीकृत समाजवादीका अमर चन्दले गठबन्धनबाट टिकट पाएका छन् भने त्यहाँ कांग्रेसका पूर्वजिल्ला सभापति गोविन्दराज जोशी र जिल्लास्तरीय नेता लक्ष्मण शाही पनि उठेका छन् ।

कैलाली ४ (२) मा कांग्रेसका प्रकाशबहादुर बमविरुद्ध कांग्रेसकै प्रेम शाह र भगवती पाठक उठेका छन् । कैलाली ५ (२) मा कांग्रेसका प्रकाशबहादुर देउवाविरुद्ध कांग्रेसकै पूर्वविद्यार्थी नेता क्षितिज भण्डारीले उम्मेदवारी दिएका छन् । मोरङ २ (१) मा सत्ता गठबन्धनका तर्फबाट उम्मेदवारी दिएका माओवादीका गणेशप्रसाद उप्रेतीविरुद्ध कांग्रेसका फणेन्द्र थापा र शमशेर कार्कीले उम्मेदवारी दिएका छन् । एकीकृत समाजवादीको भागमा परेको मोरङ ३ (२) मा पनि कांग्रेसका प्रदेश कार्यसमिति सदस्य तिलक राई उठेका छन् । त्यहाँ एकीकृत समाजवादीका लक्ष्मीकुमार श्रेष्ठ उम्मेदवार छन् ।

मोरङ ६ (२) मा कांग्रेसका तर्फबाट हालका आन्तरिक मामिला तथा कानुनमन्त्री केदार कार्कीले टिकट पाएका छन् । उनीविरुद्ध कांग्रेसकै प्रदेश कार्यसमिति सदस्य गोपाल रेग्मी बागी उठेका छन् । एमाले उम्मेदवार कृष्ण बस्नेत (पर्शुराम) को मिलेमतोमा रेग्मी उम्मेदवार बनेको एक कांग्रेस नेताको भनाइ छ ।

कांग्रेस युवा नेता गुरुराज घिमिरे उम्मेदवार बनेको मोरङ ४ (१) मा कांग्रेसकै नन्दु सरदार बागी उठेका छन् । उनी विजयकुमार गच्छादारसँगै पार्टी एकताबाट कांग्रेस प्रवेश गरेका थिए । एकीकृत समाजवादीको भागमा परेको ताप्लेजुङको प्रदेशसभा (१) मा कांग्रेस जिल्ला सदस्य मीना गुरुङ बागी छन् । उक्त क्षेत्रमा एकीकृत समाजवादीका जिल्ला इन्चार्ज खेम बनेम गठबन्धनका तर्फबाट उम्मेदवार बनेका छन् ।

एमालेबाट माओवादी प्रवेश गरेर सुनसरी २ (१) बाट उम्मेदवार बनेका द्वारिकलाल चौधरीविरुद्ध पनि कांग्रेसका वडा सभापति दीपेन्द्र घिमिरेले बागी उम्मेदवारी दिएका छन् । एकीकृत समाजवादीको भागमा परेको खोटाङको प्रदेशसभा (१) मा वीरबल काजीविरुद्ध कांग्रेसका महाधिवेशन प्रतिनिधि धर्मराज पोखरेलले बागी दिएका छन् । गठबन्धनबाट माओवादीका कुसुमकुमार श्रेष्ठ उठेको धनकुटाको प्रदेशसभा (२) मा कांग्रेसका बालानन्द दाहालले बागी उम्मेदवारी दिएका छन् ।

धनुषा ३ (२) मा गठबन्धनले लोसपाका परमेश्वर साहलाई उम्मेदवार बनाएको छ । तर, कांग्रेसका ललन चौधरी र हरिशंकर साह बागी उम्मेदवार बनेका छन् । धादिङ २ (२) मा गठबन्धनबाट माओवादीका जगत सिम्खडाले टिकट पाएकामा कांग्रेसका महासमिति सदस्य देवी पाण्डे बुर्लाकोटी बागी उठेका छन् । माओवादीको भागमा परेको गोरखा १ (१) मा पनि कांग्रेसका रामशरण आचार्य बागी छन् । त्यहाँ गठबन्धनबाट माओवादीका कृष्ण धिताल उम्मेदवार रहेका छन् ।

एकीकृत समाजवादीको भागमा परेको स्याङ्जा २ (१) मा कांग्रेसका भोजराज अर्याल बागी उम्मेदवार उठेका छन् । उक्त क्षेत्रमा गठबन्धनबाट एकीकृत समाजवादीका रामचन्द्र भट्टराई उम्मेदवार छन् । सुर्खेत १ (२) जुम्लाको प्रदेशसभा (१) , प्रदेशसभा (२), हुम्लाको प्रदेशसभा (१), कञ्चनपुर ३ (१), बैतडीको प्रदेशसभा (१), रुकुम पूर्वको प्रदेशसभा (२), बझाङको प्रदेशसभा (२), मा बागी उम्मेदवारको चहलपह बढी देखिएको छ ।

यस्तै पर्सा १ (१) मा कांग्रेसका सुधीर पटेलविरुद्ध माओवादीका रहबर अन्सारी बागी उठेका छन् । कैलाली ४ (१) मा एकीकृत समाजवादीबाट उम्मेदवार रहेका प्रदेशका भौतिक पूर्वाधार विकासमन्त्री दीर्घ सोडारीविरुद्ध माओवादीका भोजराज सापकोटा बागी उठेका छन् । कैलाली ५ (१) मा माओवादीका उम्मेदवार रमेश धामीविरुद्ध माओवादीकै रमेशकुमार बस्नेत बागी छन् । रोल्पाको प्रदेशसभा (२) मा कांग्रेसका प्रदेश सभापति अमरसिंह पुनविरुद्ध माओवादीका निवर्तमान प्रदेश सांसद दीपेन्द्र पुन बागी उठेका छन् ।

यसरी धेरै जसो क्षेत्रमा बागी उम्मेदवारी परेको छ । योसँगै स्वतन्त्र उम्मेदवारहरुको पनि संख्या कम छैन् । शीर्ष नेताहरुलाई नै हराउने भन्दै स्वतन्त्र उम्मेदवारहरु लागि रहेका छन् । बागी बनाउन दलहरुले प्यमकेज नै लिएर गए पनि मनाउन सक्ने अवस्था अहिले देखिएको छैन् । कांग्रेसले कात्तिक ४ गते सम्मको समय थप गरेको छ । तर, कसैले पनि फिर्ता लिने अवस्था भने देखिएको छैन् ।