प्रधानाध्यापक तिवारीलाई आयोगको स्पष्टीकरण

१ कात्तिक, कुश्मा । निर्वाचन आयोगले पर्वतको बाल प्राथमिक विद्यालयका प्रधानाध्यापक छविलाल तिवारीलाई स्पष्टीकण सोधेको छ ।

आगामी मङ्सिर ४ गते हुने प्रतिनिधिसभा र प्रदेशसभा सदस्य निर्वाचनका लागि जारी आचारसंहिता उल्लंघन गरेको विषयमा स्पष्टीकरण सोधिएको हो ।

निर्वाचन आचारसंहिता विपरीत राजनीतिक दल तथा उम्मेदवारको पक्ष–विपक्षमा प्रचारप्रसार गरेको भन्दै जिल्ला निर्वाचन कार्यालयले फलेवास नगरपालिका–४ मा रहेको विद्यालयका प्रधानाध्यापक तिवारीलाई २४ घण्टे स्पष्टीकरण मागेको हो ।

तिवारीले निर्वाचनको सन्दर्भमा निर्वाचन आचारसंहिता विपरीत ‘आफ्नो फेसबुक पेजमा राजनीतिक दल तथा उम्मेदवारको पक्ष विपक्षमा प्रचारप्रसार सामग्री पोष्ट तथा शेयर गरेर भोट मागी चुनावी प्रचारप्रसार गरेको’ स्पष्टीकरण पत्रमा उल्लेख गरिएको छ ।