शान्ति सम्झौता भएकै दिन रुख र हसिया हथौडामा एकअर्काले छाप लगाएकाे हाे : प्रचण्ड

१ कात्तिक, काठमाडौं । सत्तारुढ दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले विस्तृत शान्ति सम्झौतामा हस्ताक्षर भएकै दिन रुख र हसिया हथौडामा एक अर्काले छाप लगाउने काम भएको बताएका छन् ।

वाम–लोकतान्त्रिक गठबन्धनले आज ललितपुरमा आयोजना गरेको गठबन्धनमा आवद्ध दलहरुको निर्वाचन परिचालन कार्यक्रममा सहभागी अगुवा कार्यकर्ताहरु सहभागी भेलालाई सम्बोधन गर्दै अध्यक्ष प्रचण्डले कांग्रेस र कम्युनिस्ट मिलेर विस्तृत शान्ति सम्झौतामा हस्ताक्षर गरेपछि सामान्ती राजन्त्रको अन्त्य भएको बताउँदै वाम–लोकतान्त्रिक गठबन्धनका उम्मेदवारलाई निर्धक्कसँग भोट हाल्न आग्रह गरे ।

‘नेपाली कांग्रेस र कम्युनिस्ट नमिलेको भए पञ्चायती निरंकुशता ढल्ने थिएन । हामीले देखे भोगेको र सहभागी भएकै विषय हो’, अध्यक्ष प्रचण्डले भने, ‘कांग्रेस र कम्युनिस्ट मिलेर नै विस्तृत शान्ति सम्झौतामा हस्ताक्षर गरेपछि औपचारिक प्रक्रिया शुरु भएको हो । जुन दिन शान्ति सम्झौतामा हस्ताक्षर गरियो त्यही दिन रुख र हसिया हथौडामा एक अर्काले छाप लगाएको हो ।’

निर्वाचनमा प्रष्टरुपमा दुई वटा गठबन्धन रहेको उल्लेख गर्दै उनले ती गठबन्धनको मुख्य कुरा के हो भन्ने जनतालाई बुझाउन सहभागीहरुलाई निर्देशन दिए । उनले प्रतिगमनको खतरा कायम रहँदासम्म गठबन्धनलाई पूर्णरुपमा अगाडि बढाउनुपर्ने आवश्यकता रहेकाले आगामी निर्वाचनलाई सामान्यरुपमा लिन नहुने बताए ।

उनले विस्तृत शान्ति सम्झौता, संविधानसभाबाट संविधान हुँदै अगाडि बढेको नेपालको राजनीतिक परिवर्तनको प्रक्रियालाई अगाडि बढाउन पनि गठबन्धन अत्यावश्यक रहेको बताए । ‘यो सामान्य खालको चुनाव होइन, यो एउटा पार्टीले जित्ने र हार्ने भन्ने मात्रै छैन । यहाँ परिवर्तन र जनताले जित्ने कि प्रतिगमन र जनविरोधीले जित्ने भन्ने कुरा हो’ उनले भने । केपी ओली नेतृत्वको गठबन्धनलाई जनविरोधी र प्रतिगमनका पक्षधरहरुको गठबन्धन भएको आरोप लगाए ।

उनले भने, ‘अर्को गठबन्धन र हाम्रो गठबन्धन कस्तो छ भन्ने कुरा प्रष्ट छ । संविधानको रक्षा, लोकतान्त्रिक गणतन्त्रको रक्षा, समावेशी समानुपातिक मान्यतासहित संघीयताको रक्षा गर्ने प्रष्ट उद्देश्य छ । हामीले गठबन्धन बनाउँदै गर्दा प्रष्ट नै गरेका थियौ । त्यसमा हामी प्रतिवद्ध छौ ।’ उनले सत्तारुढ गठबन्धनमा रहेका दलका नेता तथा कार्यकर्ताले कुनै दुविधा नराखी एक अर्काको निर्वाचन चिन्हमा खुशी भएर मतदान गर्न समेत आग्रह गरे ।

तत्कालिन सात राजनीतिक दल र माओवादी एक आपसमा नमिलेको भए देश सङ्घीय लोकतान्त्रिक गणतन्त्रमा जान्थ्यो र उनको प्रश्न थियो ।निर्वाचनपछि गठन हुने गठबन्धनको सरकारले आर्थिक विकासको प्रक्रिया तीव्र गतिमा अगाडि बढाउने विश्वास व्यक्त गरे ।