राजु गुरुङको उम्मेदवार खारेजी निर्णयविरूद्धको मुद्दा संयुक्त इजलासमा

२ कात्तिक, काठमाडौं । रुपन्देही क्षेत्र नं. २ मा सत्ता गठबन्धनका साझा उम्मेदवार नेकपा (एस)का राजु गुरुङको रिट न्यायाधीशद्वय कुमार रेग्मी र सुस्मलता माथेमाको संयुक्त इजलासमा परेको छ ।

बैंकिङ कसुरमा कालो सूचीमा परेको भन्दै निर्वाचन अधिकृतको कार्यालयले गुरुङको उम्मेदवारी उक्त क्षेत्रबाट खारेज गरेको थियो । आयोगको खारेजी निर्णय कानूनविपरीत भएको जनाउँदै उनले अन्तरिम आदेशको माग गर्दै गएको हप्ता सर्वोच्चमा रिट दायर गरेका थिए ।

रिटमा प्रारम्भिक सुनुवाइ गर्दै सर्वोच्च अदालतले यसअघि उम्मेदवारी खारेज गर्ने निर्णय तत्काल कार्यान्वयन नगर्न न्यायाधीश विश्वम्भरप्रसाद श्रेष्ठको एकल इजलासले आइतबार अल्पकालीन अन्तरिम आदेश जारी गरेको थियो । मुद्दामा अन्तरिम आदेश दिने कि नदिने सम्बन्धमा आज रिटका विपक्षी आयोगलाई पक्षलाई बोलाइएको छ ।

रिट जारी भएको खण्डमा गुरुङ मंसिर ४ को प्रतिनिधिसभा निर्वाचनमा चुनाव लड्न पाउनेछन् । उक्त क्षेत्रबाट एमालेसहितको गठबन्धनका सझा उम्मेद्वार विष्णुप्रसाद पौडेलसँग चुनाव प्रतिस्पर्धा गर्नेछन् ।