ओलीसँग संवाद गर्न झण्डै सवा लाखले टिपाए नाम

२ कात्तिक, काठमाडौं । नेकपा (एमाले) अध्यक्ष केपी शर्मा ओलीसँग संवाद गर्न बुधबार दिउँसो साढे ३ बजेसम्म एक लाख १३ हजार चार सय ७७ जनाले नाम र सम्पर्क नम्बर टिपाएका छन् ।

ओलीले शुक्रबार सामाजिक सञ्जालमा संवाद गर्दैछन् । जसका लागि बिहीबार १२ बजेसम्म नाम टिपाउन समय दिइएको छ । उनले यो उत्साहपूर्ण सहभागिताले आफूलाई खुसी लागेको बताएका छन् ।

बुधबार सामाजिक सञ्जाल फेसबुकमा ओलीले झन्डै सवा लाख मानिसले आफूसँग संवाद गर्न चाहेको र धेरै नाम आएकाले बिहीबार १२ बजेसम्म नाम टिपाउन सकिने जानकारी दिएका छन् । संवादमा ओलीले प्रदेश र प्रतिनिधिसभा निर्वाचनबारे पार्टीका धारणा र एजेन्डा प्रस्तुत गर्ने भएका छन् ।

यसअघि ओलीले सामाजिक सञ्जालमार्फत नेपाली कांग्रेसका सभापति समेत रहेका प्रधानमन्त्री शेरबहादुर देउवासँग लाइभ डिवेट गर्न आफू तयार रहेको बताइसकेका छन् ।

ओलीको सार्वजनिक चुनौतीबारे प्रम देउवाले अहिलेसम्म कुनै प्रतिक्रिया दिएका छैनन् ।