लमजुङमा दशैंका बेला मात्रै तीन हजार खसीबोका बिक्री

८ कात्तिक, लमजुङ । लमजुङमा दशैंका बेला मात्रै तीन हजार खसीबोका बिक्री भएका छन् । जिल्लास्थित भेटेरीनरी अस्पताल तथा पशुसेवा विज्ञ केन्द्रका अनुसार लेकाली क्षेत्रमा रहेका गोठ, जिल्लाका विभिन्न स्थानमा रहेका सहकारी एवं व्यक्तिगत बाख्रा फार्मबाट सो संख्यामा खसीबोका बिक्री भएका हुन् ।

कार्यालयका अनुसार जिल्लाको उच्च लेकमा रहेका गोठहरुबाट मात्रै एक हजार पाँच सयको हाराहारीमा खसीबोका बिक्री भएको अनुमान गरिएको छ । सो बाहेक विभिन्न सहकारी एवं व्यक्तिले सञ्चालन गरेका बाख्रा फार्मबाट पनि ठूलो संख्यामा खसीबोका बिक्री भएको पशुसेवा कार्यालय लमजुङका प्रमुख डा. रुपेश श्रेष्ठले बताए ।

कार्यालय प्रमुख डा. श्रेष्ठका अनुसार जिल्लामा माग भन्दा बढी भएर सो संख्यामा खसीबोका बाहिरी जिल्लामा निर्यात भएको हो । जिल्ला बाहिर निर्यात भएका खसी बोकाको विवरण अनुमान गरिएपनि जिल्ला भित्रै बिक्री भएका खसी बोकाको अनुमान भने गर्न नसकिएको डा. श्रेष्ठले बताए ।

लमजुङ जिल्ला मासु र अण्डामा भने आत्मनिर्भर रहेको तथ्यांकले देखाएको छ । जिल्लामा प्रत्येक वर्ष चार हजार मेट्रिक टनको हाराहारीमा मासु उत्पादन हुँदै आएको छ । प्रत्येक वर्ष पाँचसय भन्दा बढी मेट्रिकटन मासु जिल्ला बाहिर निर्यात हुने गरेको तथ्यांकले देखाएको छ ।

लमजुङमा मासु प्रायोजनका लागि अत्याधिक रुपमा कुखुरा, बाख्रा, भेडा, बँगुर पालिएका छन् । अघिल्लो वर्षको तथ्यांक अनुसार जिल्लामा दुई लाख भन्दा बढी कुखुरा पालिएका छन् भने करिव दुई लाखकै हाराहारीमा बाख्रा, १२ हजार भन्दा बढी भेडा र चार हजार बंगुर पालिएको पशुसेवा कार्यालयको तथ्यांक छ ।

कृषि तथा पशुपालनमा राम्रो सम्भाव्यता भएर पनि लमजुङमा पशुजन्य उत्पादनमध्ये मासु र अण्डा पर्याप्त उत्पादन हुने गरेको छ । तर दूध र माछा उत्पादनमा भने लमजुङ अझै आत्मनिर्भर बन्न सकेको छैन । कार्यालयका अनुसार जिल्लामा अझैपनि माग भन्दा सात सय ३० मेटिक टन दूध र एक सय २७ मेट्रिकटन माछा कम उत्पादन हुँदै आएको तथ्यांकले देखाएको छ ।