सत्ता गठबन्धनद्वारा आधिकारिक उम्मेदवारको सूची सार्वजनिक,नमिलेका क्षेत्रमा मित्रवत प्रतिस्पर्धा गर्ने

११ कात्तिक, काठमाडौं । सत्ता गठबन्धनले आगामी मंसिर ४ गते हुने प्रदेश र प्रतिनिधिसभा निर्वाचनमा उठाइएका आधिकारिक साझा उम्मेदवारहरुको सूची सार्वजनिक गरेको छ । गठबन्धनका शीर्ष नेताहरुले सहमति नजुटेका क्षत्रमा आपसी सद्भावका साथ मित्रवत प्रतिस्पर्धा गर्ने सहमति पनि गरेका छन् । उनीहरुले एक आपसमा मित्रवत प्रतिस्पर्धा गर्दा एकले अर्को उम्मेदवारका विषयमा असर पार्ने खालका क्रियाकला पनि नगर्न आग्रह गरेका छन् ।

सत्ता गठबन्धनमा सहमति नहुँदा काठमाडौंको क्षेत्र न. ३ र क्षेत्र न. १० मा नेपाली कांग्रेस र नेकपा माओवादीका छुट्टाछुट्टै उम्मेदवार खडा भएका छन् । यी क्षेत्रमा सहमति नभएपछि दुवै दलका उम्मेदवारले मित्रवत प्रतिस्पर्धा गर्ने भएका हुन् । यस्तै सुदूरपश्चिम क्षोत्रमा पनि नेकपा एकीकृत समाजवादीले गठबन्धन नगर्ने भन्दै आफ्ना उम्मेदवार उठाएको छ । ती क्षेत्रमा पनि मित्रवत प्रतिस्पर्धा गरिने भएको छ ।

आज बसेको चार दलका शीर्ष नेताहरूको बैठकपछि आधिकारिक उम्मेदवार सूची सार्वजनिक गरेको हो। प्रतिनिधिसभा निर्वाचन क्षेत्रतर्फ १६५ र ३३० प्रदेशसभा निर्वाचन क्षेत्रमा गठबन्धनबाट लड्ने उम्मेदवारको सूची सार्वजनिक गरेको हो ।

केही ठाउँमा अझै पनि उम्मेदवारीबारे विवाद रहेको भन्दै गठबन्धनले छिट्टै विवाद समाधान गर्ने प्रतिवद्धता पनि जनाएको छ। जसमध्ये केही निर्वाचन क्षेत्रमा मित्रवत प्रतिस्पर्धा गर्ने गठबन्धनमा सहमति भएको छ ।​ गठबन्धनकै उम्मेदवारी रहेका क्षेत्रमा गठबन्धनकै दलबाट बागी उम्मेदवार कायमै छन् । जसले चुनाव हार्ने चिन्ता शीर्ष नेताहरुले व्यक्त गर्दै आएका छन् ।

कांग्रेस, एकीकृत समाजवादी, माओवादी केन्द्र,, लोसपा र जनमोर्चा आवद्ध रहेका यो गठबन्धनको मुख्य प्रतिस्पर्धा प्रमुख विपक्षी दल नेकपा (एमाले), जसपा, राप्रपालगायत दल आवद्ध भएका गठबन्धनसँग हुने भएको छ ।