कालिकाेटमा शक्तिशाली बम विष्फोट हुँदा २ बालिकाको मृत्यु, एक बालकसहित ३ गम्भीर घाइते

१२ कात्तिक, काठमाडौं । कालिकोटको तिलागुफा नगरपालिका–१० रानाबाडामा बम विष्फोट हुँदा २ बालिकाको मृत्यु भएको छ । विष्फोटमा परी अन्य एक बालकसहित ३ जना गम्भीर घाइते भएका छन् ।

शनिबार बिहान करिब ९ बजेको समयमा भएको बम विस्फोटबाट स्थानीय ४ वर्षीय झरना राना र ४ वर्षीय सरस्वती रानाको मृत्यु भएको प्रहरीले जनाएको छ ।विष्फोटमा परी‌ सोही ठाउँका ५ वर्षीय मुस्कान थापा, ७ वर्षीय कमल थापा, ३ वर्षीय सपना थापा  घाइते भएका छन् ।

घाइतेहरूलाई गृह मन्त्रालयको पहलमा नेपाली सेनाको हेलिकप्टरबाट उद्धार गरेर प्रदेश अस्पताल सुर्खेतमा लगिएको छ । घाइतेमध्ये बालिकाको अवस्था गम्भीर नै छ। बम कसले र किन राखेको हो ? भन्नेबारे अहिलेसम्म खुलेको छैन ।

बालबालिकाहरु खेल्ने क्रममा शनिबार बिहान करिब ९ बजेतिर भएको र विष्फोटमा परी बालिका भरmनाको घटनास्थलमै र सरस्वतीको उपचारका क्रममा अस्पतालमा मृत्यु भएको नगरपालिकाका प्रशासकीय अधिकृत लक्ष्मणप्रसाद चौलागाँईले नेपाल बहसलाई बताए । घटनाको कारणबारे केही खुलिनसकेको उनले बताए ।

यसैबीच गृृहमन्त्री बालकृष्ण खाणले विष्फोटनमा परी गम्भीर घाइते भएकाको उद्धार तथा उपचारमा कुनै कमी हुन नदिन गृह प्रशासनलाई निर्देशन दिएका छन् ।

नागरिकको जीवन रक्षा राज्यको पहिलो दायित्व भएकाले त्यसमा कुनै कसर बाँकी नराख्न गृहमन्त्री खाणले गृह प्रशासनलाई निर्देशन दिएको उनको सचिवालयले जनाएको छ ।