चुनाव बिथोल्ने विप्लव नेकपाको निर्णय

१५ कात्तिक, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले ४ मंसिरमा हुने प्रतिनिधिसभा र प्रदेशसभाको चुनाव बिथोल्ने निर्णय गरेको छ ।

हालै सम्पन्न नवौं महाधिवेशनबाट निर्वाचित केन्द्रीय समितिको ४ कात्तिकमा बसेको दोस्रो बैठकले चुनाव खारेज गर्ने निर्णय गरेको स्थायी कमिटी सदस्य सन्तोष बुढामगरले मंगलबार काठमाडौंमा आयोजित पार्टीको पत्रकार सम्मेलनमा जानकारी दिए ।

चुनाव खारेज अभियानअन्तर्गत देशव्यापी रुपमा भण्डाफोर र प्रचार अभियान चलाउने निर्णय भएको पत्रकार सम्मेलनमा उनले बताए ।

नेकपाले गएको बैशाख ३० मा सम्पन्न स्थानीय तहको निर्वाचनमा भने भाग लिएको थियो । त्यसबेला विप्लव पक्ष भाग लिने र अर्का नेता कञ्चन–सुदर्शन पक्ष बहिष्कार गर्ने कित्तामा बाँडिएपछि नेकपा विभाजित भएको थियो ।

निर्वाचन आयोगमा नेकपा दर्ता नरहेकाले आधिकारिकताबारे पार्टीभित्र खासै बहस चलाएनन् । अहिले दुवै पक्षले आफूलाई बहुमतसहित पार्टी कायमै रहेको दाबी गर्दै आइरहेका छन् ।