निर्वाचन आयोगले भन्यो, ‘प्रधानमन्त्रीलाई डडेल्धुरा जान रोक छैन्’

१६ कात्तिक, काठमाडौं ।  निर्वाचन आयोगले प्रधानमन्त्री तथा नेपाली कांग्रेसका सभापति शेरबहादुर देउवालाई निर्वाचन क्षेत्र डडेल्धुरा जान अनुमति दिएको छ । आयोगले सरकारी खर्च जाँदा निर्वाचन आचारसंहिता उल्लंघन हुने भएकाले अनुमति दिन नसकिएको भन्दै व्यक्तिगत वा पार्टीको खर्चमा प्रधानमन्त्री देउवालाई डडेल्धुरा जान नरोकिएको बताएको छ ।

यसअघि प्रधानमन्त्री तथा मन्त्रिपरिषद कार्यालयले पत्र पठाएर प्रधानमन्त्री देउवा डडेल्धुरा जाने अनुमति मागेको थियो । त्यतिबेला आयोगले सरकारी स्रोत साधन प्रयोग गरेर जान नपाइने भन्दै अनुमति दिएको थिएन । तर देउवाले व्यक्तिगत वा पार्टीको खर्चमा डडेल्धुरा जान अनुमति मागेपछि स्वीकृति दिएको आयोगको भनाइ छ ।

आयोगका एक अधिकारीले भने, ‘सरकारी स्रोत साधन प्रयोग नगरी व्यक्तिगत वा पार्टीको खर्चमा डडेल्धुरा जाने गरी अनुमति माग भएको छ, आयोगले मौखिक रुपमा अनुमति दिइसकेको छ, पत्र पठाउने प्रक्रिया बाँकी छ ।’ यसअघि आयोगले सरकारी खर्चमा प्रधानमन्त्री देउवालाई चुनावी अभियान अन्तर्गत डडेल्धुरा जाने यात्रा स्थगित गर्न भनेको थियो ।

प्रधानमन्त्री देउवा सरकारी खर्चमा निर्वाचन प्रचारप्रसारका लागि डडेल्धुरा जाने तयारीमा गरेको भन्दै यो आचारसंहित विपरित भएकोले अनुमति दिन नसकिने आयोगको भनाइ छ । गृह जिल्ला डडेल्धुरा जानका लागि देउवाले यसअघि प्रधानमन्त्री तथा मन्त्रिपरिषद् कार्यालयमार्फत आयोगसँग अनुमति मागेका थिए ।

अनुमतिका लागि निर्वाचन आयोगमा पत्र पठाएपछि उक्त पत्रको सम्बोधन गर्दै निर्वाचन आयोगको बैठक बसेको सो बैठकले सरकारी खर्चमा प्रचारप्रसारका लागि यात्रा नगर्न÷नगराउन निर्देशन दिने निर्णय गरेको आयोग स्रोतको भनाइ छ ।

निर्वाचन आयोगका एक कर्मचारीले नेपालबहसलाई भने, ‘उहाँ सरकारी खर्चमा जाने तयारीका साथ अनुमतिका लागि चिठ्ठी आएको रहेछ । आयोगले बुझ्दा उहाँ सरकारी कामका लागि नभई प्रचारप्रसारकै लागि जान खोजेकोले अनुमति दिन नसक्ने भन्ने निर्णय बैठकले गरेको हो । ’

आयोगले यसअघि प्रधानमन्त्री र मन्त्रीहरूलाई आफू उम्मेदवार भएको क्षेत्रबाहेक अन्यत्र प्रचारमा जान नदिने भनी आचारसंहितामा व्यवस्था गरेको थियो । चौतर्फी दवावपछि सरकारी स्रोतसाधन प्रयोग नगर्ने गरी आयोगको अनुमतिबाट मात्रै जान पाउने व्यवस्था परिमार्जन गरेको हो ।

प्रधानमन्त्री देउवा बुधबार नै आफ्नो निर्वाचन क्षेत्रसमेत रहेको डडेल्धुरा जाने तयारीमा थिए । बिहीबारदेखि उनको चुनावी कार्यक्रम तय गरिएको थियो । यसअघि पनि अयोगले कसको खर्चमा सरकारका उच्च अधिकारीहरु भ्रमण गरिरहेका छन भन्ने कुराको लेखा राख्न आयोगले अख्तियार दुरुपयोग अनुसन्धान आयोगलाई पत्र पठाएको थियो ।