सन्दीपको मुद्दामा थुनछेक बहस सुरू

१४ कात्तिक, काठमाडौं । एक नाबालिगमाथि बलात्कार गरेको आरोपमा पक्राउ परेका क्रिकेटर सन्दीप लामिछानेको थुनछेक बहस काठमाडौं जिल्ला अदालत बबरमहलमा सुरू भएको छ।

काठमाडौं जिल्ला अदालतका न्यायाधीश माधवप्रसाद घिमिरेको इजलासमा थुनछेक बहस सुरू भएको हो । मंगलबार उक्त इजलासले लामिछानेको बयान लिएको थियो।

सुरूमा सरकारी वकिलले पीडितको पक्षबाट र त्यसपछि सन्दीपका वकिलहरूले बहस गर्नेछन्। सरकारी वकिलको कार्यालयले सन्दीप लामिछानेविरूद्धको मुद्दा सोमबार अदालतमा दर्ता गरेको थियो।

महानगरीय प्रहरी काठमाडौंको गौशाला वृत्तमा सन्दीपविरूद्ध किशोरीले दिएको जबरजस्ती करणी गरेको जाहेरीका आधारमा प्रहरीले उनलाई असोज २० मा पक्राउ गरी अनुसन्धान गरेको थियो। मुद्दामा लामिछानेलाई १२ कैद सजाय र पीडितलाई उचित क्षतिपूर्तिको मागदाबी गरिएको छ ।

जाहेरीमा लामिछानेमाथि किशोरीलाई भदौं ५ गते राति काठमाडौंको पिंगलास्थानस्थित काठमाडौं इन होटलको ३०५ नम्बर कोठामा बलात्कार गरेको आरोप लगाइएको छ । तर लामिछानेले भने आफू निर्दोष रहेको बयान दिँदै आएका छन् ।