चुनाव बिथोल्नेबिरुद्ध सरकार कडा एक्सनमा जान्छः गृहमन्त्री

१६  कात्तिक, रुपन्देही ।  गृहमन्त्री बालकृष्ण खाँणले आगामी मंसिर ४ को प्रदेश र प्रतिनिधिसभा निर्वाचन विथोल्न खोज्ने कुनै पनि राजनीकित दल वा समूहका विरुद्ध सरकार कडा भन्दा कडा एक्सनमा जाने बताएका छन् । उनले निर्वाचनलाई भयरहित वातावरणमा सम्पन्न गराउनका लागि सरकार तम्तयार रहेको भन्दै यसलाई विथोल्न खोज्नेमाथि कडा कारवाही हुने बताएका छन् ।

लुम्बिनी प्रदेशस्तरीय सुरक्षा गोष्ठीलाई सम्बोधन गर्दै गृहमन्त्री खाँणले कुनै दल वा समूहका नाममा निर्वाचन विथोल्न र जनताको आफ्ना नेता चुन्ने पाउन अधिकार खोस्ने काम सरकारलाई सैह्य नहुने बताए । उनले कुनै दल वा समूहलाई निर्वाचनमा भाग नलिने अधिकार भएको तर, निर्वाचन बिथोल्ने अधिकार नभएकाले यस्ताविरुद्ध सरकार कारवाही जाने बताए ।

खाँणले यो निर्वाचन कुनै दल वा नेतालाई जिताउने र हराउनेभन्दा पनि देशमा प्राप्त अधिकारको संरक्षण गर्न र नागरिकको जीवनस्तर बदल्नका लागि राष्ट्रिय अभियान भएको बताए । उनले भने, ‘जनताले आफ्नो अधिकार प्रयोग गरेर आफूले चाहेको दल र नेता जिताउने र उनीहरुको माध्यमबाट प्राप्त अधिकार संरक्षण गर्ने, विकासको ढोका खोल्ने र जीवनस्तर फेर्ने अवसर हो । यसैले कुनै दल वा समूहलाई निर्वाचन विथोल्ने र नागरिकको अधिकार खोस्ने अधिकार छैन ।’

गृहमन्त्री खाँणले निर्वाचन विरोधी समूहलाई पनि राष्ट्रिय राजनीतिको मूलधारमा ल्याउन सरकारले पहल थालिरहेको बताए । ‘हामी मिल्नेसम्म लचक भएका छौं, कानुन संशोधन गरेर हुन्छ कि ऐन तर्जुमा गरेर हुन्छ सबै दललाई मूलधारमा ल्याउन र विरोधी समूहका मागहरु सम्बोधन गर्ने प्रयासमा छौं,’ उनले भने ।

खाँणले सरकार भयरहित, शान्तिपूर्ण, स्वतन्त्र र भयरहित निर्वाचन गराउन प्रतिबद्ध भएको बताउँदै त्यसअनुसार जुट्न सुरक्षाकर्मीहरुलाई निर्देशन दिए । ढुक्कसँग मतदानस्थलसम्म पुगेर आफूले रोजेको व्यक्तिलाई मतदान गरेर फर्कन सक्ने वातावरण बनाउन आवस्यक पर्ने सबै कदम चाल्न उनले निर्देशन दिए । सुरक्षा व्यवस्थापनमा कुनै कसर बाँकी नराख्नू भन्दै खाँणले नेत्रविक्रम चन्द नेतृत्वको नेकपाले आगामी प्रतिनिधिसभा र प्रदेशसभा निर्वाचन बिथोल्ने भनेकाले उसमाथि विशेष निगरानी राख्नुपर्ने बताए ।

गृह मन्त्रालय र आन्तरिक मामिला, कानुन तथा सञ्चार मन्त्रालय लुम्बिनी प्रदेशले आयोजना गरेको सुरक्षा गोष्ठीमा प्रदेशका १२ वटै जिल्लाका प्रमुख जिल्ला अधिकारी, प्रहरी प्रमुख सशस्त्र, नेपाली सेना र अनुसन्धानका अधिकारीहरू सहभागी थिए । उनीहरुले दिनभर सुरक्षा छलफल गरेर सुरक्षा योजना बनाउने प्रदेशका आन्तरिक मामिला सचिव कोमलप्रसाद धमलाले जानकारी दिए ।