१७ कात्तिक, भक्तपुर । प्रतिनिधसभा र प्रदेशसभा निर्वाचनकाे दिन नजिकिएसँगै भक्तपुरबाट उम्मेदवारी दिएका नेताहरूले स्थानीय पीडितहरूसँगै स्वरमा स्वर मिलाउन थालेका छन् । उनीहरूलाई नाै वर्षदेखि अलपत्र पारिएका सडकबारे जनताका घर दैलाे कार्यक्रममा आवाज उठाएका अवस्थामा भेटिन थालेका छन् ।
मतदातासँग मत माग्ने क्रममा सडक छिटाे बनाउन माग गर्दै चरणवद्ध आन्दाेलनमा उत्रिएका पीडितहरूकै पंक्तिमा उभिएर स्वर मिलाउन थालेका हुन् । वर्षाैदेखि अलपत्र रहेको भक्तपुर-नगरकोट सडक छिटो निर्माण गर्न स्थानीयले पटक पटक आग्रह गर्दा समेत वास्ता नगरेका दलका उम्मेदवारहरू अहिले आफै दबाबमूलक कार्यक्रमहरूकाे नेतृत्व गरिरहेका छन् ।
यही क्रममा बुधबार उनीहरूले भक्तपुर-नगरकोट सडक निर्माण छिटाे सक्न आयाेजित आन्दोलनमा ऐक्यबद्धता जनाए । उनीहरूले बिहान दुई घण्टा सडक अवरुद्ध समेत गरे । नगरकोट नाल्दुम पर्यटन विकास समितिको अगुवाईमा भएको कार्यक्रममा सबै राजनीतिक दल र तिनका उम्मेदवारलाई निमन्त्रणा गरिएको थियो ।
सता गठबन्धनमा भक्तपुर-१ का उम्मेदवार सुनिल गोठे, एमालेकोका उम्मेदबार नवराज गेलाललगायत सहभागी थिए । साथै, चाँगुनारायण नगरपालिकाको मेयर जीवन खत्री समेत सहभागी थिए ।
भक्तपुर-नगरकोट सडक अलपत्र भएको करिब नौ वर्ष भयाे । यसबीचमा आन्दोलनमा सहभागी कुनै पनि राजनीतिक दलले सडक नबनाएकाेमा विरोध गरेको थिएनन् । तर, नेपाल मजदुर किसान पार्टी (नेमकिपा) र त्यसका उम्मेदवारहरूले भने विराेध जनाउँदै आएका थिए । उसले काम नगर्ने देशैभरिका ठेकेदारसँग ठेक्का तोड्ने घोषणापत्रमा उल्लेख गरेकाे छ ।
सडक विस्तार पूरा नहुँंदा नगरकोटको पर्यटन व्यवसाय अस्तव्यस्त रहँदै आएको छ । ‘एक्जिम बैंक इन्डिया’को ऋण सहयोगमा शैलुङ र एआईपीएल जेभीले कात्तिक ०७३ मा काम सक्ने गरी २२ जेठ ०७१ मा सडक विस्तारकाे सम्झौता गरेको थियो । सडक विस्तारको ठेक्का लिएको ठेकेदार कम्पनीले सातौं पटक म्याद थपेर समेत अझै काम सकेको छैन ।
आयोजनाका अनुसार एक्जिम बैंक इन्डियाबाट ठेक्का सहमति प्राप्त प्रक्रियागत ढिलाई भन्दै पहिलोपल्ट २० अक्टाेबर ०१६ सम्म काम सक्ने गरी एक सय २५ दिन म्याद थप भयो । दोस्रोपल्ट भूकम्पको बाहानामा ४ नोभेम्बर ०१७ सम्म तीन सय ८० दिन, तेस्रो पटक सडकमा रहेको भौतिक संरचना स्थानान्तरण र रुख कटानमा ढिलाइ, स्थानीयको अवरोध, स्थानीय चुनावलगायत कारण देखाउँदै १३ जुन ०१८ मा सक्ने गरी दुई २१ दिन म्याद थप भएको थियो ।
यसअघि सोमबार पनि सडक विस्तारको नाममा ठेकेदारले आठ वर्षदेखि सडक अलपत्र पारेको भन्दै स्थानीय पर्यटन व्यवसायीले माटो थुपारेर सडक अवरुद्ध गरेका थिए । सडक विस्तार ढिलाइले पर्यटन व्यवसायी धरासायी बनेको र सडक थप जीर्ण भएको भन्दै स्थानीय बासिन्दाले माटो थुपारेर सडक अवरुद्ध गरेका थिए ।
भक्तपुर कमलविनायकदेखि नगरकोटसम्म झण्डै १६ किमि सडक चौडा र पिच गर्ने जिम्मा पाएको शैलुङका शारदा अधिकारीविरुद्ध तस्बरि टाँगेरै स्थानीयले पटकपटक आन्दोलन गर्दै आएकाछन् । अधिकारी सत्तारुढ नेकपा (माओवादी केन्द्र)का अध्यक्ष प्रचण्डका घरबेटी हुन् । उनीमाथि राजनीतिक पहुँचै कारण सडक अलपत्र छाड्दा समेत कारबाही हुन नसकेको पीडितहरुले बताउँदै आइरहेका छन् ।
धुलाम्मे सडकबाट उठेकाे धुलोले सडक किनाराका घर छोपिएका छन् भने स्थानीयकाे स्वास्थ्यमा समेत गम्भीर असर पुर्याइरहेको छ । सो सडक खण्डमा सवारी चलाउन समेत मुश्किल हुँदै आएको छ । अहिले यहाँका संघ र प्रदेशसभा सदस्यका हरेक पार्टीका उम्मेदवारले आफूलाई मत दिएर जिताए सडक सम्पन्न गरिछाड्ने आश्वासन दिने गरेका छन् ।
