रहिनन् मोटरसाइकलकाे ठक्करबाट गम्भीर घाइते परराष्ट्रकी अधिकृत आस्था

१८ कात्तिक, काठमाडाैं ।  सिंहदरबारको पूर्वीगेटमा सडक क्रस गर्ने क्रममा मोटरसाइकलको ठक्करबाट गम्भीर घाइते अधिकृत आस्था सुब्बाको मृत्यु भएको छ । सुब्बा परराष्ट्र मन्त्रालयकी शाखा अधिकृत थिइन् ।

बिहीबार साँझ कार्यालयबाट घर फर्किने बाटो काट्ने क्रममा सुब्बालाई प्रदेश नम्बर ३–०२‘–००८ प ३६१७ नम्बरको मोटरसाइकलले मोटरसाइकलले ठक्कर दिएको थियो। ठक्करबाट गम्भीर घाइते उनलाई बागबजारस्थित काठमाडौं मोडल अस्पतालमा पुर्याई उपचार गराइरहेको बेला उनको निधन भएको हो ।

२०६९ मा सेवा प्रवेश गरेकी झापा धुलाबारीकी सुब्बा मन्त्रालयको संयुक्त राष्ट्र संघ, अन्तर्राष्ट्रिय संघ संगठन तथा अन्तर्राष्ट्रिय महाशाखामा कार्यरत थिइन्। सुब्बालाई ठक्कर दिने मोटरसाइकल र चालकलाई प्रहरीले नियन्त्रणमा लिएको छ। मोटरसाइकल चालक पनि घाइते छन् ।

सुब्बाको शव पोस्टमार्टमका लागि त्रिवि शिक्षण अस्पतालमा लगिएको छ। सुब्बाका श्रीमान र एक छोरा छन् ।