ब्याजदर वृद्धिबाट आक्रोशित उद्योगी व्यवसायी प्रदर्शनमा उत्रिए, आइतबारदेखि उद्योग व्यवसाय बन्द गर्ने

१८ कात्तिक, काठमाडौं । बैंकहरुले ब्याजदर वृद्धि गरेपछि उद्योग व्यवसायीहरु आक्रोशित बनेका छन् । बैंकमा तालाबन्दीको चेतावनी दिँदै आइरहेका उनीहरुले ब्याच चर्को रुपमा बढाएको भन्दै उनीहरुले आज माइतीधर मण्डलामा प्रदर्शन गरेका छन् ।

ब्याजदरमा स्थायित्व हुनुपर्ने, सहजरुपमा ऋण नवीकरण गर्न पाउनुपर्ने, आधार दरका कारण बढेको प्रिमियम घटाउनुपर्ने, बैंक तथा वित्तीय संस्थाले लिइरहेको सेवाशुल्क घटाउने तथा अतिरिक्त शुल्क लिन नपाउनेलगायतका माग राख्दै उनीहरुको छ ।

ब्याजदर वृद्धिलगायत विभिन्न कारणले उद्योग व्यवसायको लागत बढेको भन्दै उद्योगी व्यवसायीहरुले सम्बन्धित निकायको ध्यानाकर्षणका लागि माइतीघर मण्डलामा प्रदर्शन गरेको नेपाल उद्योग वाणिज्य महासङ्घका उपाध्यक्ष दिनेश श्रेष्ठले बताए ।

‘बैंकको ब्याजदर वृद्धि उद्योगी व्यवसायीले खप्नै नसक्ने अवस्था भयो । सरकार र सम्बन्धित निकायको ध्यानाकर्षणका लागि विरोध कार्यक्रम गरेका हौं’ उपाध्यक्ष श्रेष्ठले भने । विरोध कार्यक्रमको निरन्तरताका रुपमा आइतबारदेखि विभिन्न जिल्लामा उद्योग व्यवसाय बन्द गर्ने तयारी रहेको उपाध्यक्ष श्रेष्ठले बताए ।

आजको प्रदर्शन सांकेतिक मात्र भएको र सरकारले आफूहरुको आवाज नसुने जस्तोसुकै अन्दोलन गर्ने चेतावनी प्रदर्शनकारीहरुले दिए ।

आजको प्रदर्शनमा उद्योगी व्यवसायीले ‘बैंक हामीलाई प्यारो छ, ब्याजदर वृद्धिले हामीलाई गाह्रो छ’ ‘ब्याजदर चर्को भो, गरिखान गाह्रो भो’, ‘उद्योग व्यापार नबचे अर्थतन्त्र बच्दैन’ जस्ता नारा लेखिएका ब्यानर बोकेका थिए ।