किशोर-किशोरीको हत्या प्रकरणमा थप ४ जना पक्राउ

२० कात्तिक, दाङ । तुलसीपुरमा खाल्डोमा पुरेको अवस्थामा किशोर र किशोरीको शव भेटिएको घटनामा ४ जनालाई प्रहरीले अनुसन्धानका लागि नियन्त्रणमा लिएको छ । किशोर र किशोरीको हत्या भएको आशंका उनीहरुलाई अनुसन्धानका लागि नियन्त्रणमा लिइएको हो ।

आरोपीहरुको नाम प्रहरीले सार्वजनिक गरेको छैन ।नियन्त्रणमा लिइएका सबैलाई आजै सार्वजनिक गरिने भएको छ ।
तुलसीपुर उपमहानगरपालिका–१३ स्थित दमार गाउँको जंगलमा गत असोज ३० मा १४ वर्षीय शरद आचार्य र १५ वर्षीय रोशनी महतरा मृत अवस्थामा भेटिएका थिए ।

उनीहरूलाई अन्यत्र हत्या गरेर जंगलमा लगेर पुरेको प्रहरीको अनुसन्धान निष्कर्ष छ । मृतक दुवै जनाको टाउकोमा चोट देखिएको छ ।

घटना अनुसन्धानको क्रममा प्रहरीले दमार गाउँको जंगलबाट दुईथान मोबाइल बरामद गरेको छ । घटनास्थलबाट केही पर रगत लागेको चप्पल पनि भेटिएको अनुसन्धानमा संलग्न एकजना अधिकृतले जानकारी दिए ।

यसअघि नै मृतकका चिनजानी एक युवकलाई नियन्त्रणमा लिएर प्रहरीले अनुसन्धान गर्दै आइरहेको छ ।