कर्णाली राजमार्गमा जिप दुर्घटना, ३ जनाको मृत्यु

२२ कात्तिक, काठमाडौं । कर्णाली राजमार्गमा जीप दुर्घटना भएको छ । दुर्घटनामा ३ जनाको मृत्यु भएको छ ।

मंगलबार कालिकोटको तिलागुफा–५ खल्लागाड नजिकै यात्रुवाहक जिप दुर्घटना हुँदा अन्य ७ जना घाइते भएका छन् ।
मुगुबाट सुर्खेततर्फ जाँदै गरेको भे १ च ४४१२ नम्बरको यात्रुवाहक जिप अपरान्ह १२ बजेतिर कर्णाली राजमार्गको खल्लागाड पुल नजिकै दुर्घटना भएको प्रहरीले जनाएकोा छ ।

मृत्यु हुनेमा मुगु गमगढीका २१ वर्षीय अक्कल विश्वकर्मा, २१ वर्षीय रमेश बुढा र २५ वर्षीय सुर्दशन सेजुवाल रहेको प्रहरीले जनाएको छ । अक्कलको घटनास्थलमै मृत्यु भएको र अन्य दुई जनाकाे उपचारका लागि जुम्ला लैजाने क्रममा बाटोमा मृत्यु भएको प्रहरीले जनाएको छ । घाइतेहरुको जुम्लास्थित कर्णाली स्वास्थ्य विज्ञान प्रतिष्ठान जुम्लामा उपचार भइरहेको छ ।

घाइते हुनेमा हुम्लाका २२ वर्षीय केशरी शाही, र २४ वर्षीय उज्जवल सिंह, मुगुका १७ वर्षीय धिरज बुढा, १६ वर्षीय गोपीचन्द्र बुढा, ३१ वर्षीय सन्तोष शाही, मुगु घर भएका गाडी चालक ३५ वर्षीय प्रेमसिंह बडुवाललागयत छन् ।
तीव्र गतिका कारण गाडी अनियन्त्रित भइ जीप दुर्घटना भएको हुनसक्ने प्रहरीको अनुमान छ । जीप क्षतिग्रष्त भएको छ ।