भूकम्पबाट गम्भीर घाइते दुई जनालाई सेनाको हेलिकोप्टरबाट धनगढी लगियो

२३ कात्तिक, डोटी । बुधबार बिहान गएको भूकम्पमा परि घाइते दुई जनालाई धनगढी पठाइएको छ ।

गम्भीर घाइते पूर्वीचौकी गाउँपालिका-३ की ४० वर्षीया रचना बोहरा र ५० वर्षीया बिष्ना बोहरालाई थप उपचारका लागि जिल्ला अस्पताल डोटीले धनगढी रिफर गरेको छ । उनीहरुलाई नेपाली सेनाको हेलिकोप्टरमार्फत धनगढी लगिएको हो ।

चारवटा करङ्ग भाँचिएका रचनाको छातीमा हावा जमेको र घाँटीको हड्डी भाँचिएको उपचारमा संलग्न चिकित्सकले जनाएका छन् । यस्तै बिष्नाको हात भाँचिएको छ । खुट्टामा गहिरो चोट लागेको छ ।

अन्य घाइतेहरुको उपचार जिल्ला अस्पतालमा भइरहेको अस्पताल विकास तथा व्यवस्थापन समितिका अध्यक्ष धनबहादुर नेपालीले बताए ।