प्रहरीमाथि अभद्र व्यवहार गरेको आरोपमा ८ जना नियन्त्रणमा

२३ कात्तिक, सिन्धुली । मरिण गाउँपालिका–७ ठाटी कमलेश्वर महादेव मन्दिरमा पूर्णिमा लागेको मेलामा प्रहरीमाथि अभद्र व्यवहार गरेको आरोपमा आठ जना प्रहरीको नियन्त्रण परेका छन् ।

पक्राउ पर्नेमा सोही गाउँपालिका–७ बस्ने २९ वर्षीय साङगे लो लगायत छन् । उनीहरुलाई गएराति नियन्त्रणमा  लिएको प्रहरीले जनाएको छ ।

मादक पदार्थ सेवन गरेका उनीहरूले डिउटीमा खटिएको प्रहरी टोलीमाथि अपशब्द प्रयोग गर्दै गाली गलोज गर्ने, प्रहरीको हतियार खोस्ने प्रयास लगायतका अभद्र व्यवहार कसुर गरेको प्रहरीको दाबी छ । इलाका प्रहरी कार्यालय कपिलाकोटबाट खटिएको प्रहरीले उनीहरूलाई पक्राउ गरेको हो ।

घटनामा संलग्न अन्य फरार व्यक्तिहरूको खोजी गर्नुका साथै यस सम्बन्धमा प्रहरीले थप अनुसन्धान गरिरहेको छ ।