मंसिर ४ पछि टिभीमा विश्वकप हेर्ने कि निर्वाचनको नतिजा ?

२४ कात्तिक, काठमाडौं ।  तपाइको घारमा एउटा मात्रै टेलिभिजन छ भने मंसिर ४ गतेपछि परिवारसँग कुरा नमिल्न सक्छ । मंसिर ४ गते नेपालमा आम निर्वाचन हुँदैछ भने कतारमा विश्वकप फुटबलको उद्घाटन हुँदैछ । फुटबल खेल र निर्वाचन हारजितको दुबै चासोकै विषय हुन् । तर, निर्वाचनको विषय पक्का भएपनि फुटबलको विषय भने अझै अन्योलमा छ ।

सर्वोच्च अदालतको आदेशपछि मंसिर ४ गतेदेखि कतारमा हुने २२ औं फिफा विश्वकपको नेपालमा प्रत्यक्ष प्रसारण अन्योलमा परेको छ । यो अन्योल नहटाएसम्म विश्वकप हेर्न पाइन्छ कि पााइदैन भन्ने एकिन भएको छ्रैन् । विश्व फुटबलको सर्वोच्च निकाय फिफासँग नेपालका लागि प्रशारण अधिकार खरिद गरेको मिडिया हबले विश्वकपका ६४ खेल हेरेवापत प्रयोगकर्ताले ५ सय रुपैयाँ शुल्क उठाउने तयारी गरेको थियो ।

सोहीअनुरुप विश्वकपको ग्राहक प्याकेज बिक्रीको प्रक्रिया अघि बढाएको थियो । त्यसविरुद्ध परेको मुद्दामा मंगलबार सर्वोच्च अदालतले ‘थप दस्तुर’ उठाउन खोजेको भन्दै यथास्थितिमा राख्न अल्पकालीन अन्तरिम आदेश दिएको थियो । अल्पकालीन अन्तरिम आदेश जारी गर्नेक्रममा अदालतले मिडिया हबलाई कात्तिक ३० गते उपस्थित हुन आदेश गरेको छ ।

कतारमा विश्वकप हुन चार दिनको मात्र समय राखेर बोलाइएकाले नेपालमा विश्वकपको प्रसारण अन्योलमा परेको हो । अदालतको आदेशले विश्वकपको प्रशारण अन्योलमा परेको प्रशारण अधिकार खरिद गरेको मिडिया हबले जनाएको छ । अदालती प्रक्रियामा पूरै सम्मान रहेपनि यथास्थितिमा राख्ने आदेशले सम्पूर्ण तयारी रोकिएको उसको भनाइ छ । यसले गर्दा समयमा प्रसारण सुरु गर्न चुनौतीपूर्ण देखिएको छ ।

यसका लागि हालसम्म मिडिया हबले २५ करोड रुपैयाँ भुक्तानी गरिसकेको र स्थानीय तहमा झन्डै थप ५ करोड रुपैयाँ खर्च भइसकेको बताएको छ । विश्वकप नेपालमा देखाउनका लागि झन्डै ४५ करोड रुपैयाँ लागत लाग्ने अनुमान छ । फिफाले विश्वकपका खेलहरूको प्रसारणमा नेपालको ‘टेरिटोरी लक’ गर्ने भएकाले मिडिया हबबाहेक नेपालमा अरू कुनै पनि माध्यमबाट कतार विश्वकप हेर्न नपाइने उसको दाबी छ ।