रबि लामिछानेको चुनाव प्रचारमा रहेको गाडी तोडफोड

२२ कात्तिक, चितवन । राष्ट्रिय स्वतन्त्र पार्टीको चुनावी प्रचार प्रसारका क्रममा प्रयोग गरेको गाडी तोडफोड भएको छ । इच्छाकामना गाउँपालिकाको कुरिनटारनजिक डालिमा रिसोर्ट अगाडि बा १४ च ७६८४ नम्बरको टाटा सुमाे जिप तोडफोड भएको हो ।

प्रत्यक्षदर्शी एवं पत्रकार प्रकाश सिग्देलका अनुसार सत्ता गठबन्धनको चुनावी प्रचारमा रहेको टोलीले जीपमा आक्रमण गरेको हो । स्वतन्त्र पार्टीका रवि लामिछाने आज इच्छाकामनामा घरदैलोमा थिए । लामिछानेसँगै गएको गाडीमा तोडफोड भएको हो ।

तोडफोडबाट गाडीको अगाडिको सिसा फुटेको छ । तोडफोडमा संलग्न कोही पनि पक्राउ परेका छैनन् । लामिछाने आगामी मंसिर ४ मा चितवनको क्षेत्र नं. २ बाट प्रतिनिधिसभा सदस्यका लागि चुनाव लड्दैछन् ।