एमाले नेता काफ्लेमाथि सांघातिक आक्रमण

२८ कात्तिक, गोरखा । नेकपा एमालेका नेता हरि काफ्लेमाथि चुनाव प्रचारका क्रममा गोरखाको च्याङ्लीस्थित एक हाेटलमा सांघातिक आक्रमण भएको छ ।

पालुङटार नगरपालिका-२ मा रहेको म्याङ्गो होटलमा आइतबार बेलुकी खाना खाने क्रममा विवाद हुँदा एमाले गण्डकी प्रदेश कमिटी सदस्य काफ्लेमाथि आक्रमण भएको प्रहरीले जनाएको छ ।

खाना खाने क्रममा दुई समूहबीच झगडा हुँदा काफ्ले घाइते भएका छन् । काफ्लेको टाउकोमा चोट लागेको छ। उनलाई डुम्रेस्थित स्वास्थ्य संस्थामा उपचार गरिएको छ ।

विवादपछि होटलमा रहेका टेबुलका सिसा फुटाउने र वियरका बोत्तल प्रहार भएको पाइएकाे प्रहरीले जनाएकाे छ ।  काफ्लेमाथि आक्रमण गर्ने तनहुँका दुई युवालाई प्रहरीले पक्राउ गरेकाे छ । पक्राउ पर्नेमा राम सापकोटा र अजित क्षेत्री रहेका छन्ला ।

घटनाबारे थप अनुसन्धान भइरहेको प्रहरीले जनाएको छ । घाइते काफ्ले एमालेबाट गोरखा क्षेत्र नं. २ को प्रतिनिधि सभा क्षेत्रमा उम्मेदवार रहेका अब्दुस मियाँको चुनावी कार्यक्रममा हाेटलमा पुगेका थिए ।