नेकपा बहुमतका कार्यकर्ताले मतपेटिका फुटाए, स्थगित मतदान पुन: सुचारू

४ मंसिर, काठमाडौं । कास्कीको माछापुच्छ्रे गाउँपालिका ८ तारेबराहको आधारभूत विद्यालय लुम्रे मतदान केन्द्रमा मतपेटिका फुटाइएको छ । मतपेटिका फुटाउनमा नेकपा बहुमतका एक कार्यकर्ताको हात रहेको बताइएको छ ।

मतदानका लागि कार्यकर्ता सूर्य परियारले मतपेटिका उचालेर भुइँमा बजारेका थिए । मतपेटिका फुटेर काम नलाग्ने भएको र उक्त केन्द्रमा मतदान स्थगित गरिएको थियो । परियारलाई गिरफ्तार गरिएको छ । स्थगित मतदान केहीबेर अघि मात्र मतदान पुनः सुरु भएको जनाइएको छ ।

मोहन वैद्य नेतृत्वको नेकपा (बहुमत)ले जारी निर्वाचनलाई बहिष्कारको घोषणा गरेको छ । बहुमतले बहिष्कार स्वरुप आजै बिहान काठमाडौंको माइतीघरमा प्रदर्शन समेत गरेको छ । प्रदर्शनबाट दर्जन भन्दा बढी नेता कार्यकर्तालाई प्रहरीले नियन्त्रणमा लिएको छ ।