बर्दियामा बम विस्फोटपछि स्थगित शम्भुशरण मावि केन्द्रकाे मतदान पुनः सुरु

४ मंसिर, काठमाडौं । बर्दिया खैरापुरको शम्भुशरण मावि केन्द्रमा स्थगित भएको मतदान पुनः सुरु भएको छ । मतदान केन्द्रमा बम विस्फोट भएपछि एक घण्टा मतदान कार्य स्थगित गरिएको थियो ।

मतदान केन्द्रबाहिर सुतली बम विस्फोट भएपछि रोकिएको मतदान सुचारु भएको प्रहरीले जनाएको छ । आज मतदानको दिन गुलरिया नगरपालिकाको खैरापुर, राजापुरको धोविनपुर, ठाकुरबाबाको अम्रेनी र बढैयाताल गाउँपालिकाको मैनापोखरमा प्रेसर कुकरभित्र शंकास्पद वस्तु भेटिएको र सबै डिस्पोज भइसकेको प्रहरीले जनाएको छ ।

जिल्ला प्रहरी कार्यालय बर्दियाका प्रहरी उपरिक्षक विरेन्द्रबहादुर शाहिका अनुसार बर्दियाका अन्य मतदान स्थलमा शान्तिपूर्ण ढंगले मतदान भइरहेको छ ।