जेलभित्र मतदान गर्न पाउँदा युद्ध जिते जस्तै भइरहेको छ : रेशम चौधरी

४ मंसिर, काठमाडौं । प्रतिनिधिसभा र प्रदेशसभा सदस्यका लागि देशैभर मतदान भइरहेको छ । केही स्थानमा भएका छिटपुट घट्नाबाहेक बाँकी स्थानमा शान्तिपूर्ण रुपमा मतदान भइरहेको जारी छ ।

डिल्लीबजार कारागारभित्रै रहेका रेशम चौधरीले कारागारभित्रै मतदान गरेका छन् । नागरिक उन्मुक्ति पार्टीका प्रमुख नेता रहेका चौधरीले जेलभित्र मतदान गर्न पाउँदा युद्ध जिते जस्तै भइरहेको बताए ।

थरुहट आन्दोलनका क्रममा नौ जनाको ज्यान जाने गरी भएको घटनामा दोषी ठहर भई डिल्लीबजार कारागारमा रहेका रेशमले आइतबार बिहान त्यहाँ अस्थायी मतदान केन्द्रबाट मतदान गरेका हुन् ।

चौधरी सहित डिल्लीबजार कारागारमा रहेका करिब ५ सय कैदीबन्दीले मतदान गरिएको बुझिएको छ । मतदाता नामावली भएका कैदीबन्दीले कारागारमा बनाइएको अस्थायी मतदान केन्द्रबाट प्रतिनिधिसभा सदस्य समानुपातिक तर्फ मात्र मतदान गर्न पाउने व्यवस्था गरिएको छ ।