मंसिर १५ गतेसम्ममा एमालेको बहुमतको सरकार बन्छ : ओली

४ मंसिर, काठमाडौं । नेकपा ‘एमाले’ का अध्यक्ष केपी ओलीले आइतबार भक्तपुरमा मतदान गरेका छन्। झापा-५ बाट प्रतिनिधि सभा सदस्य उम्मेदवार रहेका ओलीले मतदाता नामावली यतै रहेकाले भक्तपुरमा मतदान गरेका हुन्।

उनले भक्तपुरको बालकोटमा रहेको महेन्द्र शान्ति विद्यालयको केन्द्रमा पुगेर मतदान गरेका हुन् । चुनाव प्रचारका लागि झापामा रहेका ओली मतदानका लागि बालकोट आएका हुन् । उनी बालकोटमा नै स्थायी रुपमा बस्दै आएका छन् ।

मतदानपछि सञ्चारकर्मीसँग कुरा गर्दै अध्यक्ष ओलीले आगामी मंसिर १५ गतेसम्ममा एमालेको बहुमतको सरकार बन्ने र त्यो नभए एमालेसँग साझेदार गरेका दलहरूसँग मिलेर सरकार बनाउने बताए।

उनले केही ठाउँमा बाहेक निर्वाचन शान्तिपूर्ण रूपमा सम्पन्न हुने विश्वास व्यक्त गरे। एमालेले बहुमत ल्याउने र बहुमत नआएको खण्डमा एमालेसँग सहकार्य गरेका दलहरूको सरकार बन्ने उनको भनाइ छ।

‘चुनावले राम्रो नतिजा आउने अपेक्षा गरेको छु । तरपनि युवाहरूलाई आवेग र भावनामा बगाउने खालका प्रयास भएका छन् । तर सचेत नेपाली जनताले परास्त गरेको देख्छु’, ओलीले मतदान गर्न बाँकी रहेका मतदाताहरूलाई पनि आग्रह गरेका छन् । उनले आजको दिन देशकै लागि महत्वपूर्ण रहेको पनि बताए ।