रामेछापमा मत गणनाका लागि सर्वदलीय बैठक बस्दै

५ मंसिर, काठमाडौं । प्रतिनिधिसभातर्फ एउटा मात्र निर्वाचन क्षेत्र रहेको रामेछाप जिल्लामा मत गणना सुरु हुन सकेको छैन । मत गणनाका लागि केहीबेरमा सर्वदलीय बैठक बस्ने तयारी भइरहेको जिल्लाको मुख्य निर्वाचन अधिकृतको कार्यालयले जनाएको छ ।

मुख्य निर्वाचन अधिकृत इन्दिरा शर्माले मतगणना गर्नको लागि सर्वदलीय बैठक बोलाइएको बताइन् । दिउँसो नै सर्वदलीय बैठक गरेर आज साँझबाट मतगणना प्रक्रिया अघि बढाइने उनले बताइन् ।

मतगणना गर्न जिल्ला मालपोत कार्यालयमा प्रतिनिधिसभा र प्रदेशसभाको लागि छुट्टाछुट्टै मत गणनास्थल तयार गरिएको छ । मतगणना स्थलमा तारजाली लगाइएको छ ।

रामेछापमा एक लाख ८० हजार १०६ मतदाता रहेकामा ८८ हजार ९३३ मत खसेको छ । जिल्लाका सबै मतदान केन्द्रमा मतदान सम्पन्न भएको थियो । जिल्लाका सबै मतदान केन्द्रबाट मतपेटिका संकलन भइसकेको बताएका छन् ।

रामेछापमा सत्ता गठबन्धनबाट नेपाली कांग्रेसका पूर्णबहादुर तामाङ ‘कान्छाराम’, एमालेका कैशाल ढुंगेलबीच, मुख्य प्रतिस्पर्धी छन् । साथै नेकपा (एकीकृत समाजवादी)का रमेश बस्नेत, पूर्वजनमोर्चा समर्थित स्वतन्त्र उम्मेदवार रामकुमार घिसिङ, नेकपा (माले)का मोहन कार्की लगायत पनि प्रतिस्पर्धामा छन् ।