स्याङ्जा २ की उम्मेदवार पद्मा अर्यालको पत्रकार सम्मेलनः ४ मतदान केन्द्रमा पुनः मतदान गर्न माग

५ मंसिर, काठमाडौं । नेकपा (एमाले)की सचिव समेत रहेकी प्रतिनिधिसभाकी उम्मेदवार पद्मा अर्यालले स्याङ्जा–१ को ४ वटा मतदान केन्द्रमा पुनः मतदान गर्न माग गरेकी छन् ।

प्रतिनिधिसभा तथा प्रदेशसभाका उम्मेदवारहरूले आइतबार आयाेजना गरेकाे संयुक्त पत्रकार सम्मेलनमा उनले सत्तारुढ गठबन्धनका कार्यकर्ताले बुथ कब्जामा लिएर आफूखुशी मतदान गरेको भन्दै ४ वटा मतदान केन्द्रमा पुनः मतदान गर्न माग गरेकी हुन् ।

सत्तारुढ गठबन्धनका कार्यकर्ताले मतदान केन्द्रलाई नियन्त्रणमा लिएर, हुलहुज्जत, त्रास तथा धम्की देखाएर मतपत्र कब्जामा लिएर मतदान अधिकृतको सही गराउँदै मतपेटिकामा खसालेको आरोप सचिव अर्यालले लगाइन् ।

उनले सत्ता गठबन्धनले मतदान अधिकृतलाई घेरामा पारी बुथ कब्जा गरेको उनको संगिन आरोप छ । बुथ कब्जा भएका मतदान केन्द्रमा ९८ प्रतिशतसम्म मत खसेको देखिएको पनि उनले बताइन् ।

एमालेसहित राष्ट्रिय स्वतन्त्र पार्टीका टीकराज गुरुङ, राष्ट्रिय प्रजातन्त्र पार्टीका लालगोपाल अर्यालले पनि पुनः मतदान हुनुपर्ने माग राखेका छन् ।

चापाकोट नगरपालिकाका चारवटा बुथमा अप्रत्यासित मत खसेको र प्रहरी प्रशासन पनि गठबन्धनकै मतियार बनेको उनीहरूको आरोप छ । याे क्षेत्रमा सत्ता गठबन्धनबाट कांग्रेसका धनराज गुरुङ उम्मेदवार छन् ।