फिफा विश्वकप: साउदी अरेबियासँग अर्जेन्टिना स्तब्ध

६ मंसिर, काठमाडौं । कतारमा जारी फिफा विश्वकप फुटबल अन्तर्गत मंगलबार भएको समूह ‘सी’ को खेलमा साउदी अरेबियासँग अर्जेन्टिन नराम्रोसँग हारेको छ । हारले अर्जेन्टिना स्तब्ध भएको छ । दुई पटकको च्याम्पियन अर्जेन्टिनालाई साउदीले २–१ ले स्तब्ध पारेको हो ।

साउदीले एक गोलले पछि परेको स्थिति उल्टाउँदै अर्जेन्टिनामाथि शानदार जित निकाल्यो । उपाधिको मुख्य दाबेदार रहेको अर्जेन्टिनाले भने पहिलो खेलमै पराजय भोग्नुपर्याे । याे हारपछि अर्जेन्टिनाले लगातार ३६ खेलको अपराजित यात्रा पनि टुंगिएको छ ।

यसअघि अर्जेन्टिनासँग चार खेल खेल्दा एक खेल पनि जित्न नसकेको साउदी अरेबियाले अर्जेन्टिनालाई पहिलो पटक पराजित गरेको हो । खेलको पहिलो हाफमा क्याप्टेन लियोनल मेसीले पेनाल्टीमार्फत साउदीविरुद्ध गोल गर्दै अर्जेन्टिनालाई अग्रता दिलाएपनि त्यसपछि थप गोल गर्न नसक्दा हार व्यहोर्नु परेको छ ।

सन् २०१९ को कोपा अमेरिकामा ब्राजिलसँग सेमिफाइनलमा पराजित भएयता ३६ खेलमा अपराजित अर्जेन्टिना उच्च लयका साथ कतार पुगेको थियो ।